’تاریخ اور نوٹ بدلتے بدلتے ایک دن بی جے پی حکومت ہی بدل جائے گی‘، ممتا بنرجی کا مودی حکومت پر حملہ

مغربی بنگال کی وزیر اعلیٰ ممتا بنرجی نے مغربی میدناپور کے شالبنی میں ایک تقریب سے خطاب کرتے ہوئے مرکز کی مودی حکومت کو شدید تنقید کا نشانہ بنایا۔ انھوں نے مرکزی حکومت پر الزام عائد کیا کہ منی پور کی طرح بنگال میں بھی فساد پیدا کرنے کی کوشش ہو رہی ہے۔ انھوں نے کہا کہ ’’کرمی اور قبائلیوں کے درمیان جھگڑا لگانے کی کوشش ہو رہی ہے۔ بی جے پی نے کئی لیڈران کو کئی کروڑ روپے دیئے ہیں۔ یہاں فساد ہوگا۔ دہلی سے آرمی آئے گی اور گولی مارے گی اور آپ کچھ نہیں کر پائیں گے۔‘‘

اپنے خطاب میں ممتا بنرجی نے اسکولوں و یونیورسٹیوں میں نصاب تبدیل کرنے اور 2000 کے نوٹ کا چلن ختم کرنے پر بھی اپنی رائے ظاہر کی۔ انھوں نے کہا کہ ’’نوٹ اور تاریخ بدلتے بدلتے ایک دن حکومت ہی بدل جائے گی۔‘‘ وہ مزید کہتی ہیں کہ بی جے پی روز نئی تاریخ بدل رہی ہے، کردار بدل رہی ہے، نوٹ بدل رہی ہے۔ یہ سب بدلتے بدلتے خود ایک دن بدل جائے گی۔ پنچایت الیکشن میں ترنمول کانگریس جیتے گی اور پھر بنگال ملک کو بدلے گا۔

منی پور فساد کا تذکرہ کرتے ہوئے ممتا بنرجی نے کہا کہ وہاں فساد برپا کیا گیا ہے۔ کئی لوگ مارے گئے ہیں، لیکن وہ (پی ایم مودی) آج تک نہیں گئے۔ منی پور میں خون بہہ رہا ہے، لیکن کچھ لوگ ناچ گانا کر رہے ہیں۔ میں بھی منی پور جانا چاہتی ہوں، لیکن ہمیں جانے نہیں دیا جائے گا۔ جس طرح آسام جانے کی کوشش کی تھی، لیکن وہاں جانے نہیں دیا گیا تھا۔