مصنوعی بارش ہوئی نہیں مگر دہلی حکومت نے خرچ کردیا بڑا عوامی فنڈ، آر ٹی آئی سے ہوا انکشاف

 قومی راجدھانی کی زہریلی ہوا سے نمٹنے کے لیے دہلی حکومت کے ذریعہ اکتوبر 2025 میں کئے گئے مصنوعی بارش (کلاؤڈ سیڈنگ) کے تجربے پر عوامی فند سے 37.93 لاکھ روپئے خرچ ہوئے مگر پورا پروجیکٹ رازداری کے اندھیرے میں چھُپا ہوا ہے۔ ’انڈیا ٹوڈے‘ کی طرف سے دائر کی گئی آر ٹی آئی کے ذریعے یہ رقم سامنے آئی لیکن اخراجات کی تفصیلات، ٹھیکے کا عمل اورنتائج کو پوری طرح چھپایا گیا ہے۔

معلوم ہوکہ کلاؤڈ سیڈنگ ایک سائنسی طریقہ ہے جس میں کیمیکل جیسے سلور آئیوڈائڈ یا نمک کو بادلوں میں اسپرے کیا جاتا ہے۔ یہ کیمیکل بادلوں میں پانی کی بوندیں بنانے میں مدد کرتے ہیں،جس سے بارش ہوتی ہے۔ دہلی میں اسے آلودگی کم کرنے کے لیے آزمایا گیا کیونکہ بارش ہوا میں موجود دھول اورآلودگی پیدا کرنے والے ذرات کو صاف کرکے نیچےگرادیتی ہے۔ آئی آئی ٹی کانپور نے یہ تجربہ کیا تھا۔ انہوں نے ایک چھوٹے طیارے (جیسے سیسنا) سے کیمیکل کا چھڑکاؤ کیا۔ 28 اکتوبر 2025 کو دو بار کوششیں کی گئیں لیکن بادلوں میں نمی کا تناسب صرف 15-20 فیصد تھا (ضروری 50 فیصد سے بہت کم)، اس لیے اس کا کوئی خاص نتیجہ سامنے نہیں آیا۔

خبر کے مطابق اس پورے عمل کے دوران دہلی حکومت نےآئی آئی ٹی کانپور کو 37,93,420 روپے دیئے۔ اس کے علاوہ ٹھیکہ نامنیشن بنیاد پر دیا گیا یعنی بغیر ٹینڈر کابینہ کی منظوری سے (جی ایف آر رول 194کےتحت) لیکن خرچ کی آئٹم وائز تفصیل(ہوائی جہاز کا خرچ، کیمیکل، افرادی قوت وغیرہ) دینے سے انکار کر دیا گیا۔ تجارتی رازداری کا حوالہ دیتے ہوئے انوائس یا بل کی کاپی فراہم نہیں کی گئی۔ کابینہ نوٹ، ورک آرڈرز اور ایم او یو جیسے دستاویزات چھپائے گئے۔ آئی آئی ٹی کانپور نے یہ بھی کہا کہ یہ ایک تحقیقی کانٹریکٹ ہے جس میں تکنیکی اور دانشورانہ املاک کی حساس معلومات ہیں، اس لیے وہ اسے ظاہر نہیں کریں گے۔

دونوں نے آر ٹی آئی ایکٹ کی دفعہ 8(1)(a)، (d)، (e) اور (i) کا حوالہ دیا۔ یہ دفعات مالیاتی مفادات، تجارتی رازداری، کابینہ کے دستاویزات اور دیگر معلومات کو چھپانے کی اجازت دیتی ہیں لیکن عوام کے پیسے سے کیے جانے والے تجربے کے باوجود عوام کو حساب نہ دینا بڑے سوال کھڑے کرتا ہے۔ اتنا سب کچھ کرنے کے باوجود بارش نہیں ہوئی کیونکہ بادلوں میں نمی کم تھی۔ کچھ رپورٹس میں کہا گیا ہے کہ آلودگی میں 6-10 فیصد کمی آئی ہے لیکن ماہرین اس کی وجہ موسم کا اثر بتاتے ہیں۔ دہلی کی سردیوں میں کلاؤڈ سیڈنگ مشکل ہے کیونکہ مناسب بادل کم ہوتے ہیں۔ یہ صرف عارضی حل ہے، آلودگی کی بنیادی وجوہات (گاڑیاں، پرالی جلانا، تعمیرات) کو نہیں حل کرتا ہے۔ واضح رہے کہ دہلی میں ہر سال آلودگی جان لیوا ہوتی ہے۔ حکومتیں نئی ​​ٹیکنالوجی آزماتی ہیں لیکن شفافیت اور طویل مدتی حل کا فقدان تشویشناک ہے۔ عوام کا پیسہ خرچ ہوا مگر جواب دہی کہاں؟