’مذاکرہ کے لیے دہشت گردی اور دشمنی سے پاک ماحول ضروری‘، پاکستانی وزیر اعظم کو ہندوستان کا دو ٹوک جواب

ہندوستان نے جمعرات کے روز پڑوسی ملک پاکستان کو دو ٹوک جواب دیتے ہوئے واضح کر دیا کہ اگر ہندوستان کے ساتھ بات چیت کرنا چاہتے ہیں تو اس کے لیے دہشت گردی اور دشمنی سے پاک ماحول ضروری ہے۔ دراصل معاشی بحران کا سامنا کر رہے پاکستانی وزیر اعظم شہباز شریف نے حال ہی میں ایک بار پھر ہندوستان کے ساتھ مذاکرہ کی خواہش ظاہر کی تھی۔

ہندوستانی وزارت خارجہ کی جمعرات کو ہونے والی ہفتہ واری پریس کانفرنس میں ترجمان ارندم باگچی نے کہا کہ ہم نے (شہباز شریف کی پیشکش سے متعلق) رپورٹ دیکھی ہے۔ ہندوستان کا رخ اس بات پر قائم ہے کہ ہم سبھی ممالک کے ساتھ دوستانہ رشتہ چاہتے ہیں... لیکن اس کے لیے دہشت گردی اور دشمنی سے پاک ماحول بنانا ہوگا۔

اس سے قبل منگل کے روز پاکستانی وزیر اعظم شہباز شریف نے ہندوستان کے ساتھ بات چیت کی خواہش ظاہر کی تھی۔ انھوں نے اسلام آباد  میں ’منرل سمٹ‘ کی افتتاحی تقریب کو خطاب کرتے ہوئے کہا تھا کہ ملک کی تعمیر کے لیے وہ پڑوسیوں کے ساتھ بات کرنے کو تیار ہیں۔