پنجاب: امرتسر میں زہریلی شراب سے ہلاکتوں کی تعداد 14 ہوئی، 9 افراد گرفتار، ڈی ایس پی، ایس ایچ او معطل

امرتسر: پنجاب کے ضلع امرتسر کے مجیٹھا علاقے میں زہریلی شراب پینے سے ہلاک ہونے والے افراد کی تعداد 14 ہو گئی ہے۔ دریں اثنا، پولیس نے فوری کارروائی کرتے ہوئے 9 افراد کو گرفتار کر لیا ہے، جن میں اس دھندے کے مرکزی سرغنہ کے ساتھ کئی مقامی فروشندے بھی شامل ہیں۔ پنجاب پولیس کے ڈائریکٹر جنرل (ڈی جی پی) نے سوشل میڈیا پلیٹ فارم ‘ایکس’ پر ایک پوسٹ میں بتایا کہ یہ افسوسناک واقعہ زہریلی شراب پینے سے پیش آیا اور پولیس نے واقعہ کے بعد فوری کارروائی کی ہے۔

ڈی جی پی نے اپنی پوسٹ میں کہا کہ پولیس نے زہریلی شراب کے کاروبار سے وابستہ 9 افراد کو گرفتار کیا ہے اور یہ بھی انکشاف ہوا ہے کہ زہریلی شراب تیار کرنے کے لیے آن لائن خریدا گیا میتھانول استعمال کیا گیا۔ انہوں نے بتایا کہ معاملے کی گہرائی سے تحقیقات جاری ہیں تاکہ پورے نیٹ ورک کو بے نقاب کیا جا سکے اور سبھی مجرموں کو قانون کے کٹہرے میں لایا جائے۔

ڈی جی پی نے مزید کہا کہ متعلقہ افراد کے خلاف بی این ایس اور آبکاری ایکٹ کی مختلف دفعات کے تحت ایف آئی آر درج کی گئی ہے۔ لاپروائی برتنے پر ڈی ایس پی سب ڈویژن مجیٹھا اور تھانہ مجیٹھا کے ایس ایچ او کو فوری طور پر معطل کر دیا گیا ہے اور ان کے خلاف محکمانہ تحقیقات بھی شروع کر دی گئی ہیں۔ انہوں نے کہا کہ پنجاب پولیس زہریلی شراب کے جال کو توڑنے اور لاپروائی برتنے والے اہلکاروں کو جوابدہ بنانے کے لیے پرعزم ہے۔

دوسری جانب، امرتسر کے تھریےوال گاؤں میں بھی زہریلی شراب سے تین افراد کی موت کے بعد عوام میں شدید غصہ پایا جاتا ہے۔ مقامی باشندوں نے انتظامیہ پر لاپروائی کا الزام عائد کرتے ہوئے معاوضے کا مطالبہ کیا ہے۔

ایک مقامی شہری نے غصے کا اظہار کرتے ہوئے کہا کہ ’’جب پنجاب میں عام آدمی پارٹی کی حکومت آئی تو ہمیں امید تھی کہ نشے کا خاتمہ ہوگا لیکن یہ وعدہ وفا نہ ہوا۔ آج وزیر اعلیٰ یہاں آ رہے ہیں لیکن انہیں چاہیے کہ سیاست لاشوں پر نہ کریں۔‘‘

متوفی افراد کے اہل خانہ کا کہنا ہے کہ گاؤں میں زہریلی شراب کھلے عام فروخت کی جا رہی تھی اور یہی شراب پی کر تین افراد کی جان چلی گئی تھی۔ گاؤں کے سرپنچ نے بھی تصدیق کی کہ یہ پہلا واقعہ نہیں ہے بلکہ طویل عرصے سے یہ غیر قانونی کاروبار جاری ہے، جس کی شکایتیں پولیس کو کئی بار دی جا چکی تھیں۔

سرپنچ نے بتایا کہ حالیہ دنوں میں پولیس نے دو افراد کو تو گرفتار کیا لیکن باقی مجرم اب بھی آزاد گھوم رہے ہیں۔ اگر وقت پر سخت کارروائی کی گئی ہوتی تو شاید آج یہ قیمتی جانیں بچ جاتیں۔