اکشے لاکڑا نے دہلی میں سب سے مہنگے ٹول ٹیکس ’یو ای آر 2‘ منڈکا کے خلاف عدالت میں داخل کی عرضی

نئی دہلی: دہلی پردیش یوتھ کانگریس کے صدر اکشے لاکڑا نے دہلی میں نافذ کیے گئے سب سے مہنگے ٹول ٹیکس یو ای آر-2 (مُنڈکا) کے خلاف دہلی ہائی کورٹ میں عرضی داخل کر دی ہے۔ ان کا کہنا ہے کہ یہ ٹول دہلی اور این سی آر کی عوام کے ساتھ سراسر ناانصافی اور عوامی مفاد کے منافی ہے۔

اکشے لاکڑا نے میڈیا سے گفتگو کرتے ہوئے کہا کہ دہلی میں پہلی بار اتنا بھاری ٹول ٹیکس لگایا گیا ہے، جو دہلی میں دیہی علاقوں کے رہائشیوں کے ساتھ کھلی ناانصافی ہے۔ وہ کہتے ہیں کہ ’’ہم نے عوامی مفاد کو سامنے رکھتے ہوئے عدالت کا دروازہ کھٹکھٹایا ہے اور اس قانونی لڑائی کو اب ہم پوری طاقت کے ساتھ لڑیں گے۔‘‘

اکشے نے الزام عائد کیا کہ بھارتیہ جنتا پارٹی (بی جے پی) نے دہلی دیہی اور این سی آر کے رہائشیوں کے ساتھ دھوکہ کیا ہے۔ ان کے مطابق دہلی دیہی کے تمام رہائشی اس لڑائی میں ان کے ساتھ ہیں اور سبھی ہائی کورٹ میں انصاف کا مطالبہ کریں گے۔ دہلی یوتھ کانگریس صدر نے کہا کہ یہ سراسر ناانصافی ہے کہ جس سڑک کے لیے دہلی کے باشندوں کی زمین لی گئی، اب اسی پر چلنے کے لیے دہلی والوں سے روزانہ 235 روپے وصول کیے جا رہے ہیں۔

اکشے لاکڑا کہتے ہیں کہ ’’قانونی طور پر یہ واضح ہے کہ 20 کلومیٹر کے فاصلے کے لیے کوئی ٹول ٹیکس وصول نہیں کیا جا سکتا، لیکن دہلی کی عوام کو ایسی کوئی رعایت نہیں دی جا رہی۔‘‘ انھوں نے مزید کہا کہ ’’یہ دہلی کی عوام کے ساتھ بڑی زیادتی ہے۔ ہم نے عدالت میں اپیل کی ہے اور ہمیں یقین ہے کہ ضرور انصاف ملے گا۔‘‘