جنگ کا شاخسانہ! اسرائیل کو 6 روزہ جنگ میں تقریباً 27000 کروڑ روپے کا نقصان اٹھانا پڑا

 ایران کے خلاف امریکہ اور اسرائیل  کی مشترکہ کارروائی کے بعد مشرق وسطیٰ میں مچی افراتفری نے کئی ممالک کو متاثر کیا ہے مگر اس دوران اسرائیل کو سب سے زیادہ نقصان ہونے کا اندازہ لگایا جارہا ہے۔ خبروں کے مطابق اس جنگ کو 6 دن ہو چکے ہیں۔ دونوں ممالک مسلسل ایک دوسرے پر حملے کر رہے ہیں۔ اس تنازعہ میں سینکڑوں لوگ اپنی جانیں گنوا چکے ہیں۔ اس کے باوجود کسی بھی ملک کی طرف سے جنگ کے خاتمے کے لیے کوئی پہل ہوتی نظر نہیں آرہی ہے۔ امریکہ اور اسرائیل دونوں مل کر ایران پر حملہ کر رہے ہیں جبکہ ایران تنہا جوابی کارروائی کر رہا ہے جس کی وجہ اسرائیل کی معیشت کو خاصا نقصان پہنچا ہے۔

ان خبروں کے درمیان اسرائیلی وزارت خزانہ نے کہا ہے کہ ایران کے ساتھ جاری فضائی جنگ سے ملک کی معیشت کو ہر ہفتے 9 ارب شیکل (تقریباً 2.93 ارب ڈالر) کا نقصان ہو سکتا ہے۔ اس کا مطلب ہے کہ ہندوستانی روپئے میں اسرائیل کو ہر ہفتے 27000 کروڑ روپے کا نقصان اٹھانا پڑ سکتا ہے۔ مطلب صاف ہے کہ اس جنگ سے اسرائیل کو بھاری نقصان ہو رہا ہے۔ اگر یہ جنگ جاری رہی تو یہ نقصان مزید بڑھ سکتا ہے۔

جنگ کا ملک میں دیگر سرگرمیوں پر بھی براہ راست اثر پڑ رہا ہے۔ اسرائیل کی ہوم فرنٹ کمانڈ نے فی الحال ملک بھر میں کئی سخت پابندیاں عائد کر رکھی ہیں۔ ان پابندیوں کے تحت کام پر جانے والے لوگوں کی تعداد محدود کی گئی ہے۔ اسکول بند ہیں اور ریزرو فوجیوں کو بڑے پیمانے پر تعینات کیا جا رہا ہے۔ جنگ کے سبب اسرائیل کے بیشتر علاقوں میں ضروری خدمات کے علاوہ بیشتر کاروبار بند ہیں۔ زیادہ تر ملازمین گھر سے کام کر رہے ہیں۔ جنگ کی وجہ سے عوامی اجتماعات پر پابندی لگا دی گئی ہے۔ ان سخت پابندیوں کی وجہ سے اگلے ہفتے سے معیشت کو تقریباً 9.4 ارب شیکل فی ہفتہ کا نقصان ہونے کا خدشہ ہے۔

اس دوران وزارت خزانہ نے ہوم فرنٹ کمانڈ کو حکم دیا ہے کہ پابندیوں کو ریڈ سے ہٹا کر اورینج (کم سخت) کیا جائے۔ اگر آئندہ ایک سے دو دنوں کے اندر ایسا ہوتا ہے تو کام کرنے والے دفاتر میں کچھ نرمی دی جا سکتی ہے۔ جو کام جنگ اور ورک فرام ہوم کی وجہ سے متاثر ہے وہ پورا ہوسکتا ہے۔ اس سے اقتصادی نقصان کم ہوکر تقریباً 4.3 ارب شیکل فی ہفتہ رہ سکتا ہے۔ تاہم پابندیوں میں نرمی کے حوالے سے ابھی تک کوئی واضح حکم جاری نہیں کیا گیا ہے۔