ایران-اسرائیل میں شدید جنگ جاری، صہیونی ریاست کے کئی شہروں پر میزائل حملے

ایران اور اسرائیل کے درمیان جنگ نے شدت اختیار کر لی ہے۔ دونوں طرف سے ایک دوسرے پر مسلسل میزائلوں کی بارش ہو رہی ہے۔ اسرائیل اور امریکہ کی طرف سے مل رہی دھمکیوں کے آگے ایرانی حکمراں جھکنے کو تیار نہیں ہیں۔ اس درمیان اسرائیل کے حملوں کے بعد ایران نے بھی شدید جوابی حملہ کیا ہے۔ اس نے آج  اسرائیل کے کئی شہروں پر بیلسٹک میزائلوں سے حملہ کیا۔

بتایا جاتا ہے کہ ایران کے اس حملے سے اسرائیل کو بڑا نقصان پہنچا ہے۔ یہ حملہ سوروکا میڈیکل سینٹر پر کیا گیا جو جنوبی اسرائیل میں ایک بڑا اسپتال ہے۔ لوگوں کو علاج کے لیے یہاں آنے سے منع کر دیا گیا ہے۔ اسرائیل کی وزارت خارجہ نے اس حملے کی تصدیق کی ہے۔

اس سے قبل اسرائیلی فوج نے اعلان کیا کہ وہ ایران پر تازہ حملے کر رہی ہے۔ لبنانی نیوز آؤٹ لیٹ ’المائدین‘ کی ایک رپورٹ کے مطابق ایران کی راجدھانی تہران میں حملے کی خبریں ملی ہیں جبکہ تہران کے مغرب میں کرج شہر کے پاس بھی دھماکوں کی آوازیں سنی گئی ہیں۔ اسرائیل نے دعویٰ کرتے ہوئے کہا کہ اس نے تہران میں ایران کے انٹرنل سیکوریٹی ہیڈکوارٹر کو تباہ کر دیا ہے۔

وہیں ایران کی طرف سے بھی اسرائیل پر حملے تیز کر دیئے گئے ہیں۔ ایران کے ذریعہ میزائلیں داغے جانے کے بعد وسط اسرائیل میں ہوائی حملے کے سائرن بجنے لگے۔ ایک طرف جہاں ایران، اسرائیل پر میزائلیں داغ رہا ہے وہیں دوسری طرف وہ اسرائیل کے حملوں کو ناکام کرنے میں بھی لگا ہے۔ رپورٹ کے مطابق ایرانی بحریہ فی الحال کرج اور اس کے باہری علاقوں کے آسمان میں اسرائیلی اہداف کو روک رہی ہے۔

ایران کی ایس این این نیوز ایجنسی کی رپورٹ کے مطابق ایرانی دستوں نے تہران کے اوپر فضائی دفاع کو فعال کر دیا ہے اور تہران کے باہری علاقوں میں کئی ڈرون کو مار گرایا ہے۔

ایران اور اسرائیل کے درمیان جاری جنگ میں دونوں طرف کافی نقصان  بھی ہو رہا ہے۔ اس لڑائی میں ایک طرف جہاں شہریوں کی جان جا رہی ہے وہیں دوسری طرف میزائل حملوں سے عمارتوں اور اہم مقامات کو بھاری نقصان پہنچ رہا ہے۔ واشنگٹن واقع گروپ ہیومن رائٹس ایکٹیوسٹس نے کہا ہے کہ اسرائیل-ایران لڑائی 7ویں دن میں داخل ہو چکی ہے اور ایران بھر میں اسرائیلی حملوں سے کم سے کم 639 لوگ مارے گئے ہیں اور 1320 افراد زخمی ہوئے ہیں۔