اکھلیش کی متوفی بی ایل او کے اہل خانہ کو 2 لاکھ روپے کی مدد، بی جے پی پر ووٹ کاٹنے کی سازش کا الزام

لکھنؤ: سماجوادی پارٹی کے صدر اکھلیش یادو نے ہفتے کو ملیح آباد میں متوفی بی ایل او وجے ورما کے اہلِ خانہ سے ملاقات کی اور انہیں دو لاکھ روپے کی مالی مدد فراہم کی۔ اس موقع پر انہوں نے یوپی حکومت سے مطالبہ کیا کہ متاثرہ خاندان کو ایک کروڑ روپے کا معاوضہ اور کنبہ کے ایک فرد سرکاری ملازمت فوری طور پر فراہم کی جائے، کیونکہ ان کے مطابق یہ حادثہ بی ایل اوز پر بڑھتے ہوئے دباؤ کا نتیجہ ہے۔

اکھلیش یادو نے اس موقع پر بی جے پی پر سخت تنقید کرتے ہوئے الزام لگایا کہ حکومت ایس آئی آر سروے کے نام پر بوتھ سطح کے عملے پر غیر ضروری دباؤ ڈال رہی ہے۔ انہوں نے کہا کہ بی جے پی اس تیزی کے پیچھے پوشیدہ مقصد رکھتی ہے اور یہ سروے ووٹ چھیننے کی سازش کا حصہ ہے۔ انہوں نے مزید کہا کہ بلدیاتی اداروں کے صفائی ملازمین تک کو ایس آئی آر معاون بنایا جا رہا ہے، جو کام کے تقاضوں کے خلاف ہے اور اس سے غلطیاں اور دباؤ دونوں بڑھ رہے ہیں۔

ایس پی صدر نے کہا، ’’بابا صاحب ڈاکٹر بھیم راؤ امبیڈکر کے دیے گئے آئینی حقوق کو کمزور کرنے کی کوشش ہو رہی ہے۔ بی ایل او وجے ورما کی موت اسی دباؤ کا نتیجہ ہے۔‘‘ انہوں نے اعلان کیا کہ اگر حکومت نے یہ طرزِ عمل نہیں بدلا تو سماجوادی پارٹی بڑے پیمانے پر احتجاج کرے گی۔

اکھلیش نے ضمنی انتخابات میں الیکشن کمیشن کی کارکردگی پر بھی سوال اٹھائے۔ انہوں نے دعویٰ کیا کہ ’’ضمنی انتخابات کے دوران ای سی خاموش بیٹھا رہا، بوتھ لوٹے گئے، سی سی ٹی وی فوٹیج موجود ہیں مگر کارروائی نہیں ہوئی۔‘‘ ان کا کہنا تھا کہ بی جے پی اپنی شکست کے بعد مسلسل بوکھلاہٹ میں ہے اور ووٹ کٹوتی کی حکمت عملی اپنا رہی ہے۔

انہوں نے ایس پی کے رکنِ پارلیمان راجیو رائے کے خط کا حوالہ دیتے ہوئے کہا کہ گھوسی لوک سبھا حلقے کے تحت مختلف اسمبلی سیٹوں میں تقریباً 20 ہزار ووٹ کم کیے گئے ہیں۔ انہوں نے الزام لگایا، ’’ای سی آئی کی ویب سائٹ پر اعداد و شمار واضح ہیں۔ بی جے پی وسائل میں مضبوط ہے، اسی لیے نوئیڈا کی ایک کمپنی کے ذریعے ڈیٹا اکٹھا کر رہی ہے۔‘‘

اکھلیش یادو نے بی جے پی کو ’مافیا جیوی پارٹی‘ قرار دیتے ہوئے کہا کہ ’’بی جے پی میں نیٹ (این ای ای ٹی) مافیا، اسکریپ مافیا اور سیرپ مافیا سرگرم ہیں۔‘‘ انہوں نے کہا کہ بی جے پی کی سابقہ سیاسی چالوں کی مثالیں عوام کے سامنے ہیں اور موجودہ اقدامات بھی اسی سلسلے کا حصہ ہیں۔