’اجیت پوار کا خاتون آئی پی ایس سے دھمکی آمیز لہجہ این ڈی اے کے تکبر کی علامت‘ وائرل ویڈیو پر کے سی وینوگوپال کا ردعمل

ممبئی: مہاراشٹر کے ڈپٹی چیف منسٹر (نائب وزیر اعلیٰ) اجیت پوار کی ایک ویڈیو کے منظر عام پر آنے کے بعد حزب اختلاف کی جانب سے سخت ردعمل ظاہر کیا جا رہا ہے۔ کانگریس کے جنرل سکریٹری کے سی وینوگوپال نے اس واقعے پر سخت ردعمل ظاہر کرتے ہوئے کہا ہے کہ اجیت پوار کا تکبر بھرا انداز صرف ان کے ذاتی رویے کی عکاسی نہیں کرتا بلکہ یہ این ڈی اے کے اقتدار کے غرور کی جھلک بھی ہے۔

خیال رہے کہ وائرل ہو رہی ویڈیو میں اجیت پوار سولاپور ضلع کے مادھا تعلقہ کے کُردو گاؤں میں غیر قانونی کھدائی روکنے گئی خاتون آئی پی ایس انجنا کرشنا سے مبینہ طور پر کارروائی بند کرنے کے لیے کہتے اور دھمکی آمیز انداز اختیار کرتے نظر آ رہے ہیں۔

ویڈیو میں اجیت پوار خاتون افسر سے یہ کہتے سنائی دیتے ہیں، ’’تم اتنی نڈر ہو؟ میں کارروائی کروں کیا؟‘‘ بعد میں وہ افسر سے ان کا فون نمبر طلب کرتے ہیں اور ویڈیو کال پر بھی رابطہ کرتے ہیں۔ کہا جا رہا ہے کہ اس دوران انہوں نے کارروائی فی الحال روکنے اور تحصیلدار سے بات کرنے کی ہدایت دی۔

یہ واقعہ اس وقت پیش آیا جب پولیس کو غیر قانونی مٹی کھدائی کی شکایت ملی تھی۔ ڈپٹی ایس پی انجنا کرشنا موقع پر پہنچ کر کارروائی کر رہی تھیں کہ مقامی افراد نے مخالفت کرتے ہوئے اجیت پوار کو فون ملا دیا۔ افسر نے ابتدا میں کال پر یقین نہیں کیا تو پوار نے خود کو ڈپٹی سی ایم بتایا اور پھر ویڈیو کال کے ذریعے گفتگو کی۔

اس واقعے نے اپوزیشن کو حکومت پر حملہ کرنے کا موقع دیا۔ شیو سینا کی رکن پارلیمان پرینکا چترویدی نے کہا، ’’یہی ہے اقتدار کا غرور! ایک ڈپٹی سی ایم کا ایک خاتون افسر سے اس طرح دھمکی آمیز لہجے میں بات کرنا افسوسناک ہے۔‘‘

اب اس معاملے پر کانگریس کے جنرل سکریٹری کے سی وینوگوپال کا بھی سخت ردعمل سامنے آیا ہے۔ انہوں نے کہا، ’’جس متکبرانہ لہجے میں مہاراشٹر کے ڈپٹی سی ایم اجیت پوار نے آئی پی ایس انجنا کرشنا سے بات کی، وہ ظاہر کرتا ہے کہ این ڈی اے کے اراکین اقتدار کے نشے میں چور ہیں۔ یہ ایک مثال ہے کہ کس طرح اوپر سے نیچے تک ایک متکبرانہ کلچر سرایت کر گیا ہے۔ ایک افسر کو غیر قانونی سرگرمیوں کے خلاف کارروائی کرنے پر سراہنے کے بجائے اجیت پوار نے انہیں ڈانٹا اور ان کی کوششوں میں رکاوٹ ڈالی۔‘‘

انہوں نے مزید کہا کہ اجیت پوار کی بعد کی وضاحت محض ’چہرہ بچانے کی کوشش‘ ہے۔ وینوگوپال نے کہا، ’’یہ افسوسناک ہے کہ انہوں نے اب تک اپنے رویے پر معافی نہیں مانگی۔ ان کا برتاؤ ایک عوامی نمائندے کے شایانِ شان نہیں تھا اور یہ صاف ظاہر کرتا ہے کہ کس طرح این ڈی اے کے حکمران قانون کو اپنے قابو میں رکھنے کی کوشش کرتے ہیں۔‘‘

این سی پی کی جانب سے دفاع پیش کرتے ہوئے کہا گیا کہ اجیت پوار کا مقصد کارروائی کو مکمل طور پر روکنا نہیں بلکہ کارکنوں کو پرسکون کرنا تھا۔ ریاستی صدر سنیل تٹکرے نے کہا، ’’اجیت دادا اپنی صاف گوئی کے لیے جانے جاتے ہیں۔ ان کا مقصد صورتحال کو وقتی طور پر سنبھالنا رہا ہوگا۔‘‘

تاہم، کانگریس اور دیگر اپوزیشن جماعتوں نے اس وضاحت کو مسترد کر دیا ہے۔ سماجی کارکن انجلی دمنیا اور وجے کنبھار نے کہا کہ ایک عوامی نمائندے کی جانب سے قانون پر اس طرح اثرانداز ہونا ناقابل قبول ہے۔