اسدالدین اویسی کے بھائی اکبر الدین اویسی بیمار، لندن میں چل رہا علاج

حیدرآباد: آل انڈیا مجلس اتحاد المسلمین (اے آئی ایم آئی ایم) کے سربراہ اسد الدین اویسی کے بھائی اکبر الدین اویسی کی طبیعت ناساز ہے۔ میڈیا رپورٹوں کے مطابق ان کا علاج لندن میں چل رہا ہے۔

اکبر الدین موجودہ وقت میں تلنگانہ کے چندریان گٹا اسمبلی حلقہ انتخاب سے رکن اسمبلی ہیں اور اسد الدین اویسی نے دار السلام میں منعقدہ عید ملن تقریب کے دوران پارٹی کے ارکان سے خطاب کرتے ہوئے اکبر الدین کے بیمار ہونے کی اطلاع دی تھی۔

اسد الدین اویسی نے پارٹی کارکنان سے کہا کہ وہ اکبر الدین کی صحت یابی کے لئے دعا کریں۔ انہوں نے کہا، ’’میں آپ کو عید کی مبارک باد پیش کرتا ہوں اور آپ سے درخواست کرتا ہوں کہ آپ اکبر الدین کی صحت یابی کے لئے دعا کریں، وہ علاج کے لئے گئے ہوئے ہیں۔ مجھے خبر ملی ہے کہ ان کی صحت ایک مرتبہ پھر خراب ہو گئی ہے۔ اللہ انہیں محفوظ رکھے اور ان کو جلد صحت یاب کرے۔‘‘

دریں اثنا، آندھرا پردیش کے وزیراعلی و صدر وائی ایس آر کانگریس جگن موہن ریڈی نے مجلس کے لیڈر اکبر الدین اویسی کی عاجلانہ صحت یابی کے لئے نیک تمناؤں کا اظہار کیا ہے۔ ٹوئٹر پر ایک پیام جاری کرتے ہوئے جگن موہن ریڈی نے کہا کہ وہ اکبرالدین اویسی کی عاجلانہ صحت یابی اور بہتر صحت کے لئے دعا کرتے ہیں۔

واضح رہے کہ اکبر الدین پہلی مرتبہ علاج کے لئے باہر نہیں گئے ہیں۔ ان کے خاندانی ذرائع نے بتایا کہ اکبر الدین حج کرنے کے لئے سعودی عرب گئے تھے اور وہیں سے وہ علاج کے لئے لندن چلے گئے۔ خبروں کے مطابق انہیں آنتوں کی بیماری لاحق ہے۔ اسد الدین اس سے پہلے بھی پارٹی کے حامیوں سے اپنے بھائی کی سلامتی کے لئے دعا کرنے کو کہہ چکے ہیں۔