جے پور کے سوائی مان سنگھ اسپتال کے آئی سی یو میں بھیانک آتشزدگی، 6 مریضوں کی دردناک موت

 جے پور: راجستھان کی راجدھانی جے پور کے سب سے بڑے سوائی مان سنگھ (ایس ایم ایس) اسپتال کے آئی سی یو وارڈ میں آگ لگ گئی۔ اس واقعے میں 6 مریضوں کی موت ہو گئی ہے۔ ایس ایم ایس اسپتال ٹراما سینٹر کے انچارج ڈاکٹر انوراگ ڈھاکڑ نے بتایا کہ آتشزدگی شارٹ سرکٹ کی وجہ سے ہوئی اور تیزی سے پھیل گئی۔

سینٹر کے انچارج نے وضاحت کی کہ آئی سی یو میں داخل زیادہ تر مریض نازک حالت میں ہوتے ہیں اورکوما میں ہوتے ہیں۔ ان کا سروائیول ریفلیکس بھی کمزور ہو تا ہے انہیں مسلسل سپورٹ سسٹم کی ضرورت ہوتی ہے۔ آگ کی وجہ سے وہاں زہریلی گیسیں خارج ہو رہی تھیں اور ہمیں انہیں سپورٹ سسٹم کے ساتھ دوسری جگہ شفٹ  کرنا پڑا۔ ایسی حالت میں مریضوں کی حالت مزید خراب ہوگئی۔

آتشزدگی کے بعد تشویشناک مریضوں کو نچلی منزل پر واقع آئی سی یو میں منتقل کرنے کی کوشش کی گئی لیکن انہیں بچایا نہیں جا سکا۔ اس دوران 6 مریضوں نے دم توڑ دیا۔ اطلاع کے مطابق حادثے میں جان گنوانے والوں میں  پنٹو (سیکر)، لودیپ (جے پور)، شری ناتھ (بھرت پور)، رکمنی (بھرت پور)، کھرما (بھرت پور) اور  بہادر (جے پور) شامل ہیں۔

ابتدائی طور پر آتشزدگی کی وجہ واضح نہیں ہوسکی تھی حالانکہ بعد میں شارٹ سرکٹ کا انکشاف ہوا۔ فائر بریگیڈ کی تقریباً 12 گاڑیوں کی مدد سے دو گھنٹے کی سخت مشقت کے بعد آگ پر قابو پالیا گیا۔

ہولناک حادثے کے بعد راجستھان کے وزیر اعلیٰ بھجن لال شرما، نائب وزیر اعلیٰ پریم چند بیروا سمیت کئی وزراء اور ممبران اسمبلی ایس ایم ایس اسپتال پہنچے۔ آگ لگنے سے پورے اسپتال میں خوف و ہراس پھیل گیا۔ اس دوران اہل خانہ نے الزام لگایا کہ دھواں نکلنے کے بعد عملے کو اطلاع دی گئی لیکن کسی نے معاملے کو سنجیدگی سے نہیں لیا اورجب  دھواں بڑھنے لگا تو میڈیکل اسٹاف بھاگ نکلا اور کسی نے مدد بھی نہ کی۔