ڈاکٹر منظور عالم: علمی خدمات اور سماجی اتحاد کی روشنی، نئی کتاب کی رسم اجرا

نئی دہلی: انسٹی ٹیوٹ آف آبجیکٹو اسٹڈیز کے بانی ڈاکٹر منظور عالم کی شخصیت اور خدمات پر مبنی کتاب "ڈاکٹر محمد منظور عالم: امپاورنگ دی مارجنلائزڈ" کی رسم اجرا بدھ کو کانسٹی ٹیوشن کلب کے ڈپٹی اسپیکر ہال میں منعقد ہوئی۔ تقریب میں ملک و بیرون ملک کے دانشور، سیاستدان اور سماجی رہنماؤں نے شرکت کی اور ڈاکٹر عالم کی علمی، سماجی اور فکری خدمات پر اظہار خیال کیا۔

ملائشیا کے وزیر اعظم ڈاکٹر انور ابراہیم نے اپنے پیغام میں کہا کہ ڈاکٹر منظور عالم کی شخصیت ایک تحریک ہے جو ہمیشہ زندہ رہے گی اور ان کی حیات و خدمات پر لکھی گئی کتاب آئندہ نسلوں کے لیے مشعل راہ ہوگی۔ انہوں نے کہا کہ ڈاکٹر عالم سے ان کا تعلق چالیس سال سے زائد عرصے پر محیط ہے اور وہ ان میں ایک مخلص دوست اور دوراندیش رہنما پاتے ہیں۔

انٹرنیشنل انسٹی ٹیوٹ آف اسلامک تھنک ٹینک امریکہ کے سکریٹری جنرل پروفیسر عمر حسن کسولے نے کہا کہ علم کو تبدیلی کا محرک بنانا ڈاکٹر منظور عالم کا گرانقدر کارنامہ ہے، جس کا نمونہ صحابی رسول حضرت مصعب بن عمیر رضی اللہ عنہ کی ذات میں ملتا ہے۔ انہوں نے بتایا کہ ڈاکٹر عالم نے سعودی عرب میں اعلیٰ عہدے پر خدمت کے باوجود ہندوستان میں اپنے ہم وطنوں کی پسماندگی دور کرنے کے لیے انسٹی ٹیوٹ آف آبجیکٹو اسٹڈیز قائم کیا، جس نے دنیا کے دیگر حصوں کے لوگوں کو بھی روشنی دکھائی۔

سابق مرکزی وزیر سلمان خورشید نے کہا کہ ڈاکٹر منظور عالم کی شخصیت ہم سب کے لیے روشنی کا مینار ہے اور انسٹی ٹیوٹ کا قیام ایک بے مثال کارنامہ ہے۔ پروفیسر امیتابھ کنڈو نے یاد دلایا کہ ڈاکٹر عالم کمیونٹی تک محدود نہیں بلکہ ملک و قوم کے مفادات میں ہمیشہ سرگرم رہے۔ پروفیسر فیضان مصطفی نے حیرت کا اظہار کیا کہ ڈاکٹر عالم نے مشکل سے قسم کے دانشوروں کو ایک جگہ بٹھا کر علمی جدت کی مثال قائم کی۔

ڈاکٹر عبداللہ معتوق نے کہا کہ ڈاکٹر عالم شعور و دانش کی آواز ہیں۔ ڈاکٹر ایس وائی قریشی نے ہندوستان میں معیاری تحقیق کی کمی پر روشنی ڈالی اور کہا کہ ڈاکٹر عالم اس شعبے کے محرک اول ہیں۔ پروفیسر اخترالواسع نے کہا کہ ڈاکٹر عالم نے تھنک ٹینک کے تصور کو عملی شکل دی، جبکہ جان دیال نے کہا کہ ان کے کام سے دیگر محروم طبقات بھی فائدہ اٹھا سکتے ہیں۔ شری شری روی شنکر نے کہا کہ ڈاکٹر عالم سماجی تقسیم کو ختم کرنے کی جدوجہد میں ہمیشہ پیش پیش رہے۔ احمد حسن عمران نے ڈاکٹر عالم کی شخصیت کی خصوصیت بیان کی کہ جو بھی ان سے ملتا ہے، ان کا دوست اور گرویدہ بن جاتا ہے۔

تقریب کی ابتدا ڈاکٹر نکہت حسین ندوی کی قرآن کی تلاوت اور ترجمہ سے ہوئی، استقبالیہ کلمات ڈاکٹر زیڈ ایم خان نے پیش کیے جبکہ خطبہ صدارت پروفیسر محمد افصل وانی نے دیا۔ انہوں نے کہا کہ انسٹی ٹیوٹ آف آبجیکٹو اسٹڈیز سچ کو سچ کی طرح دیکھنے اور دکھانے کی تحریک ہے اور ڈاکٹر عالم کے ذہن کی پیداوار فقہ اکیڈمی آف انڈیا اور آل انڈیا ملی کونسل بھی ہیں۔