امریکہ میں شدید سرد طوفان کی وارننگ، پروازیں منسوخ، معمولات زندگی متاثر، ٹرمپ کا طنز، کہاں گئی گلوبل وارمنگ؟

امریکہ کے بڑے حصوں میں شدید سردی اور برفیلے طوفان کی وارننگ کے درمیان صدرڈونالڈ ٹرمپ نے ایک بار پھر گلوبل وارمنگ پر طنز کیا ہے۔ ٹرمپ نے اپنے سوشل میڈیا پلیٹ فارم ’ٹروتھ سوشل‘ پر پوسٹ کرتے ہوئے کہا کہ جب امریکہ کی 40 ریاستوں میں ریکارڈ سردی پڑنے والی ہے تو پھر گلوبل وارمنگ آخر کہاں گئی؟

محکمہ موسمیات کی پیشن گوئی کے مطابق امریکہ کے تقریباً دو تہائی حصے میں زبردست سرمائی طوفان دستک دینے والا ہے۔ اس سرد طوفان کی وجہ سے بھاری برف باری، تیز ہوائیں، کڑاکے کی سردی اور بڑے پیمانے پر بجلی گُل ہونے کا انداشہ ظاہر کیا گیا ہے۔ تقریباً 40 ریاستوں میں سرد لہر کی وارننگ جاری کی گئی ہے، جسے حالیہ برسوں میں شدید ترین سردی کے دوروں میں سے ایک مانا جارہا ہے۔

امریکی صدر ٹرمپ نے اپنی پوسٹ میں ٹرمپ نے لکھا کہ 40 ریاستیں ریکارڈ سردی کا تجربہ کرنے جا رہی ہیں، ایسی صورت حال بہت کم دیکھی گئی ہے۔ اس کے ساتھ ہی انہوں نے ماحولیاتی کارکنوں پر بھی طنزیہ تنقید کرتے ہوئے پوچھا کہ آخر گلوبل وارمنگ کا کیا ہوا؟ ٹرمپ طویل عرصے سے موسمیاتی تبدیلی پر شکوک و شبہات کا اظہار کرتے رہے ہیں اور اس سے قبل وہ اسے ایک دھوکہ اور سیاسی ایجنڈا قرار دے چکے ہیں۔

ڈونالڈ ٹرمپ نے اپنے پہلے دور صدارت کے دوران 2020 میں امریکہ کو پیرس موسمیاتی معاہدے سے الگ کر لیا تھا۔ اس کے بعد انہوں نے اپنی دوسری مدت کے آغاز میں (2025 میں) بھی امریکہ کو عالمی معاہدے سے الگ کر دیا۔ ٹرمپ کا خیال ہے کہ موسمیاتی پالیسیاں امریکی صنعت اور معیشت کو نقصان پہنچاتی ہیں۔ ٹرمپ صاف توانائی پالیسیوں کے بجائے فوسل فیول کی کھلی حمایت کے لیے جانے جاتے ہیں۔ ان کا مشہور نعرہ ’’ڈرل، بیبی، ڈرل تیل‘‘ اور گیس کی کھدائی کے حق میں ان کی سوچ کی عکاسی کرتا ہے۔ ان کا دعویٰ ہے کہ اس سے توانائی سستی ہوگی اور ملازمتوں میں اضافہ ہوگا۔

امریکہ میں سمندری طوفان کے قریب آنے سے فضائی ٹریفک شدید متاثر ہوا ہے۔ فلائٹ ٹریکنگ ویب سائٹس کے مطابق جمعہ کو ریاست ہائے متحدہ امریکہ میں آنے اور جانے والی 1,500 سے زیادہ پروازیں یا تو منسوخ کردی گئیں یا انہیں تاخیر کا سامنا کرنا پڑا۔ ڈلاس، اٹلانٹا اور اوکلاہوما کے بڑے ہوائی اڈے خاص طور پر متاثر ہوئے۔ موسمیات سے متعلق اداروں کے مطابق تقریباً 16 کروڑ لوگ سرمائی طوفان یا شدید سردی کی وارننگ کی زد میں ہیں۔ کئی علاقوں کو بیک وقت برفانی طوفان اور شدید سردی کا خطرہ ہے۔ حکام نے لوگوں کو مشورہ دیا ہے کہ وہ غیر ضروری سفر سے گریز کریں اور سردی سے بچاؤ کے لیے احتیاطی تدابیر اختیار کریں۔