افریقی ملک زامبیا میں ’ایم-پاکس‘ سے دوسری ہلاکت، کیسز کی تعداد 49 تک پہنچ گئی

لوساکا: جنوبی افریقی ملک زامبیا میں مہلک بیماری ایم پاکس سے دوسری ہلاکت کی تصدیق کی گئی ہے۔ یہ بات جمعرات کو زامبیا کے وزیرِ صحت الیجا موچیما نے پریس کانفرنس میں بتائی۔ ان کے مطابق نئی ہلاکت ملک کے موچنگا صوبے کے ماپیکا ضلع میں رپورٹ ہوئی ہے اور متاثرہ افراد میں ایک 10 سالہ بچہ بھی شامل ہے۔

واضح رہے کہ زامبیا میں ایم پاکس کا پہلا کیس گزشتہ سال اکتوبر میں سامنے آیا تھا جبکہ اس بیماری سے پہلی موت گزشتہ ماہ ہوئی تھی۔ اب تک ملک بھر میں ایمپاکس کے مجموعی طور پر 49 کیسز رپورٹ ہو چکے ہیں۔

وزیر صحت کے مطابق 2 اپریل سے 15 اپریل کے درمیان ایم پاکس کے 13 نئے کیسز سامنے آئے۔ ان کا کہنا تھا کہ زامبیا کے 10 میں سے 6 صوبے اس بیماری سے متاثر ہو چکے ہیں۔ اب تک 32 مریض صحت یاب ہو چکے ہیں اور انہیں گھر بھیجا جا چکا ہے، جبکہ 15 مریض اب بھی ہوم آئسولیشن میں ہیں اور ان کی نگرانی کی جا رہی ہے۔

انہوں نے مزید بتایا کہ وزارتِ صحت ایم پاکس کے کیسز کی شناخت، ان کی جانچ اور بیماری کے پھیلاؤ کو روکنے کے لیے مختلف شراکت دار اداروں کے ساتھ مل کر کام کر رہی ہے۔

دوسری جانب، زامبیا میں ہیضے کے کیسز میں بھی اضافہ دیکھا گیا ہے۔ تازہ اعداد و شمار کے مطابق اب تک 490 افراد ہیضے سے متاثر ہو چکے ہیں، جن میں سے 18 نئے کیسز گزشتہ دو ہفتوں کے دوران سامنے آئے ہیں۔ وزیرِ صحت کے مطابق ان میں سے تقریباً 480 افراد صحت یاب ہو چکے ہیں، جبکہ اب تک ہیضے سے 9 افراد کی موت ہو چکی ہے۔

عالمی ادارۂ صحت (ڈبلیو ایچ او) کے مطابق ایم پاکس ایک متعدی بیماری ہے جو جسم پر تکلیف دہ دانوں، بخار، سردرد، پٹھوں کے درد، پیٹھ کے درد، تھکن اور لمف نوڈز کے بڑھنے کا سبب بن سکتی ہے۔ اگرچہ اکثر مریض اس بیماری سے مکمل طور پر صحت یاب ہو جاتے ہیں، لیکن بعض کیسز میں یہ بیماری شدید بھی ثابت ہو سکتی ہے۔

ایم پاکس انسان سے انسان میں قریبی جسمانی یا زبانی رابطے کے ذریعے منتقل ہو سکتی ہے، خصوصاً جب متاثرہ فرد کے ساتھ گھر میں یا قریب رابطہ ہو۔ یہ بیماری متاثرہ شخص کے ساتھ بات کرنے، سانس لینے یا جلد کے لمس سے بھی پھیل سکتی ہے۔

ایم پاکس کی علامات عام طور پر انفیکشن کے 1 سے 21 دن بعد ظاہر ہوتی ہیں، لیکن اکثر ایک ہفتے کے اندر سامنے آ جاتی ہیں۔ علامات کا دورانیہ عموماً 2 سے 4 ہفتے تک ہوتا ہے، تاہم جن افراد کی قوت مدافعت کمزور ہوتی ہے، ان میں علامات طویل عرصے تک برقرار رہ سکتی ہیں۔