پرتگال میں برقع پر پابندی کا بل منظور، عوامی مقامات پر چہرہ ڈھانپنے پر 4 ہزار یورو جرمانہ تجویز

لزبن: پرتگال کی پارلیمنٹ نے ایک متنازع بل کو منظور کر لیا ہے جس کے تحت عوامی مقامات پر نقاب یا برقع پہننے پر پابندی عائد کی جائے گی۔ یہ بل دائیں بازو کی انتہا پسند جماعت ’چیگا پارٹی‘ کی جانب سے پیش کیا گیا تھا، جس کا ہدف بالخصوص مسلمان خواتین کے برقع اور نقاب ہیں۔

پارلیمنٹ میں جمعہ کے روز ہونے والی ووٹنگ میں بل کو مرکز کی دائیں بازو کی جماعتوں کی حمایت حاصل رہی، جبکہ بائیں بازو کی جماعتوں اور چند چھوٹی پارٹیوں نے اس کی مخالفت یا غیر حاضری اختیار کی۔ اس بل کے مطابق صنفی یا مذہبی وجوہات کی بنا پر عوامی مقامات پر چہرہ ڈھانپنا قابلِ سزا عمل تصور کیا جائے گا۔

بل میں تجویز دی گئی ہے کہ اگر کوئی شخص عوامی مقام پر نقاب پہنتا ہے تو اس پر 200 سے 4000 یورو (تقریباً 4 لاکھ 10 ہزار روپے تک) جرمانہ عائد کیا جا سکتا ہے، جبکہ کسی خاتون کو نقاب پہننے پر مجبور کرنے والے شخص کو تین سال تک قید کی سزا دی جا سکتی ہے۔

اس قانون کے تحت طیاروں، سفارتی دفاتر اور عبادت گاہوں میں چہرہ ڈھانپنے کی اجازت برقرار رہے گی۔ تاہم، اگر یہ بل حتمی منظوری حاصل کر لیتا ہے تو پرتگال ان یورپی ممالک کی صف میں شامل ہو جائے گا جہاں نقاب پر مکمل یا جزوی پابندی عائد ہے، جیسے فرانس، بیلجیم، آسٹریا اور نیدرلینڈز۔

بل کو اب آئینی امور، حقوق، آزادیوں اور ضمانتوں سے متعلق پارلیمانی کمیٹی میں بھیجا جائے گا، جہاں اس کا تفصیلی جائزہ لیا جائے گا۔ بعد ازاں یہ بل صدر مارسیلو ربیلو ڈیسوزا کے دستخط کے لیے پیش کیا جائے گا، جو اسے ویٹو بھی کر سکتے ہیں یا آئینی عدالت کو بھیج سکتے ہیں۔

چیگا پارٹی کے سربراہ آندرے وینتورا نے پارلیمنٹ میں بل کی منظوری کو تاریخی دن قرار دیا۔ انہوں نے کہا، ’’آج ہم اپنی بیٹیوں اور آنے والی نسلوں کو برقع پہننے کے دباؤ سے محفوظ کر رہے ہیں۔‘‘ ان کا کہنا تھا کہ یہ بل پرتگالی اقدار، قومی شناخت اور خواتین کے حقوق کے تحفظ کے لیے اہم قدم ہے۔

دوسری جانب بائیں بازو کی جماعتوں نے اس اقدام کو مسلمانوں کے خلاف امتیازی کارروائی قرار دیا ہے۔ سوشلسٹ پارٹی کے رکن پیڈرو ڈیلگاڈو آلوِس نے کہا، ’’کسی خاتون کو نقاب پہننے پر مجبور نہیں کیا جانا چاہیے، مگر اسی طرح کسی کو اسے اتارنے پر مجبور کرنا بھی درست نہیں۔‘‘

پرتگال میں مسلمانوں کی آبادی کم ہے اور نقاب یا برقع پہننے والی خواتین کی تعداد نہایت محدود ہے۔ اس کے باوجود یورپ کی طرح یہاں بھی یہ مسئلہ سیاسی اور سماجی تقسیم کا سبب بن رہا ہے۔ تجزیہ کاروں کے مطابق یہ بل ملک میں دائیں بازو کی سیاست کے بڑھتے اثرات کی علامت ہے، جس میں مذہب اور ثقافت کے نام پر شناختی سیاست کو ہوا دی جا رہی ہے۔