شادی میں نہیں شریک ہوئے دفتر کے ساتھی، مایوس لڑکی نے چھوڑ دی نوکری

چین سے تعلق رکھنے والی ایک لڑکی کی کہانی دفتری دوستی اور حقیقی زندگی کے رشتوں میں فرق کو صاف طور پر واضح کرتی ہے۔ اسے اپنی شادی جیسے خاص موقع پر اپنے ساتھ کام کرنے والوں سے دوستی اور تعاون کی امید تھی لیکن اس کا یہ اعتماد پارہ پارہ ہوگیا۔ اس ایک واقعے نے نہ صرف اسے جذباتی طور پر مجروح کیا بلکہ اس کی نوکری چھوڑ نے کا بھی سبب بن گیا۔ اس سلسلے میں چین کی ایک لڑکی کے ساتھ پیش آئے واقعہ نے سوشل میڈیا پر لوگوں کو جذباتی کردیا ہے۔ وہ پچھلے5 سالوں سے ایک ہی کمپنی میں کام کر رہی تھی اوراسے لگتا تھا کہ دفتر میں اس کے ساتھیوں کے ساتھ اچھے اور سچے تعلقات ہیں۔

شادی کی تیاریوں کے دوران وہ پہلے صرف اپنے قریبی دفتری دوستوں کو مدعو کرنا چاہتی تھی لیکن اسے ڈرتھا کہ اگر کچھ لوگوں کو مدعو کیا اورکچھ کو نہیں تو دفتر میں غلط فہمی یا تناؤ ہو سکتا ہے۔ اس لئے اس نے اپنے پورے شعبہ میں تقریباً 70 لوگوں کو دوماہ قبل ہی شادی کا دعوت نامہ بھیج دیا۔ اتنا ہی نہیں اس نے شادی سے پہلے دفتر کے کئی لوگوں کو تحائف بھی دیے لیکن شادی کے دن جو ہوا اس سے وہ بری طرح ٹوٹ گئی۔ 70 میں سے صرف ایک ہی ساتھی شادی میں پہنچا جواس کا جونیئر تھا اور شاید ذمہ داری کی وجہ سے وہ شریک ہوا۔

دلہن نے اپنے دفتر کے ساتھیوں کے لیے 6 بڑی میزیں بک کروائی تھیں لیکن وہ سب خالی رہ گئیں۔ کافی کھانا خراب ہو گیا تھا اور سب سے اہم بات یہ تھی کہ اس کو اپنے گھر والوں اور سسرال والوں کے سامنے شدید شرمندگی محسوس ہوئی۔ اس کو ایسا لگا کہ جن لوگوں کے ساتھ اس نے 5 سال کام کیا انہوں نے اس کے جذبات کی ذرا بھی قدر نہیں کی۔ اب یہ واقعہ لوگوں کے درمیان سوال کھڑے کررہا ہے کہ کیا دفتر کے رشتے حقیقت میں دوستانہ ہوتے ہیں اور کیا شادی جیسے اہم مواقع پر دفتر سے اتنی امید رکھنا سہی ہے؟۔