نیپال کی پارلیمنٹ تحلیل، عبوری حکومت کی سربراہی کے لیے سوشیلا کارکی کے نام پر لگی مہر، آج ہی لیں گی حلف!

نیپال میں سیاسی بحران ختم ہوتا دکھائی دے رہا ہے۔ جین-زی یعنی نوجوانوں کی قیادت میں ہوئے پُرتشدد مظاہروں کے بعد پیدا مشکل حالات اب بہتر ہو سکتے ہیں۔ یہ امکان اس لیے ظاہر کیا جا رہا ہے، کیونکہ سوشیلا کارکی کی قیادت میں عبوری حکومت تشکیل دینے کا راستہ ہموار ہو گیا ہے۔ آج نیپالی صدر رام چندر پوڈیل نے موجودہ پارلیمنٹ کو تحلیل کر دیا اور سابق چیف جسٹس سوشیلا کارکی کو عبوری حکومت کا سربراہ بنانے کا فیصلہ کیا۔

میڈیا رپورٹس کے مطابق صدر پوڈیل کے ساتھ فوجی چیف جنرل اشوک راج سگدیل کی موجودگی میں جین-زی گروپوں کی میٹنگ ہوئی۔ اس میٹنگ میں سوشیلا کارکی کو عبوری حکومت کا چیف بنانے پر اتفاق قائم ہوا۔ اس کے بعد صدر پوڈیل نے کارکی کو بھی میٹنگ میں مدعو کیا اور ان سے اس ذمہ داری کو سنبھالنے کی گزارش کی۔ کارکی نے یہ گزارش قبول کرتے ہوئے عبوری حکومت کی قیات کرنے پر رضامندی ظاہر کی۔ موصولہ خبروں میں بتایا جا رہا ہے کہ سوشیلا کارکی آج شب پریسیڈنٹ ہاؤس میں عہدہ اور رازداری کا حلف لیں گی۔

قابل ذکر ہے کہ وزیر اعظم کے پی شرما اولی کو اپنی حکومت کے خلاف بدعنوانی، اقربا پروری اور سوشل میڈیا پابندی کو لے کر جین زی کی قیادت میں 8 اور 9 ستمبر کو ہوئے ملک گیر پُرتشدد احتجاجی مظاہرہ کے سبب استعفیٰ دینے کے لیے مجبور ہونا پڑا تھا۔ جین-زی مظاہرین کا مطالبہ تھا کہ موجودہ پارلیمنٹ کو تحلیل کر کے ملک میں آئندہ قومی انتخاب تک ایک عبوری حکومت تشکیل دی جائے۔ اس مطالبہ کو رام چندر پوڈیل نے فوجی چیف کے ساتھ غور و خوض کے بعد قبول کر لیا ہے۔

بہرحال، تازہ ترین خبروں کے مطابق عبوری حکومت کے تحت ایک چھوٹی کابینہ تشکیل دینے کی تیاری چل رہی ہے۔ سینئر ایڈووکیٹ اوم پرکاش آریل اور نیپال الیکٹرسٹی اتھارٹی کے سابق چیف کلمان گھیسنگ اس عبوری حکومت میں وزیر بن سکتے ہیں۔ جین-زی گروپوں کی طرف سے بھی ایک یا دو نمائندوں کو عبوری حکومت میں شامل کیا جا سکتا ہے۔ سوشیلا کارکی کی حلف برداری کے بعد عبوری حکومت کی پہلی کابینہ میٹنگ پریسیڈنٹ ہاؤس میں ہی ہوگی، جس میں جیوڈیشیل جانچ کمیشن اور بدعنوانی کے خلاف ایک طاقتور جانچ کمیشن بنانے کا فیصلہ ہو سکتا ہے۔