لاس اینجلس میں شدید آگ: تباہی کے دوران لوٹ مار، 20 گرفتار

لاس اینجلس: امریکی شہر لاس اینجلس کے جنگلات میں بھڑکنے والی آگ شدت اختیار کر چکی ہے، جس سے بڑے پیمانے پر تباہی پھیل رہی ہے۔ محکمہ موسمیات نے خبردار کیا ہے کہ تیز ہوائیں آگ کو مزید بڑھا سکتی ہیں، جس سے حالات اور بگڑ سکتے ہیں۔ آگ کے ساتھ ساتھ علاقے میں لوٹ مار کے واقعات بھی پیش آ رہے ہیں، جس پر پولیس نے کارروائی کرتے ہوئے کئی افراد کو گرفتار کیا ہے۔

لاس اینجلس کاؤنٹی کے شیرف رابرٹ لونا نے میڈیا سے بات کرتے ہوئے کہا کہ منگل کو پہلی آگ لگنے کے بعد سے متاثرہ علاقوں میں لوٹ مار کے الزام میں تقریباً 20 افراد کو گرفتار کیا جا چکا ہے۔ انہوں نے عوام کو تنبیہ کی کہ وہ انخلاء کے احکامات کی پابندی کریں۔ لونا کا کہنا تھا، ’’جب انخلاء کا حکم نافذ ہو اور کوئی اس علاقے میں موجود ہو تو وہ قانون کی خلاف ورزی کر رہا ہوتا ہے، اور اگر وہ کوئی مجرمانہ عمل کرے تو یہ معاملہ اور سنگین بن جاتا ہے۔‘‘

شیرف نے مزید کہا کہ غیر مقامی افراد کو بھی متاثرہ علاقوں میں داخل ہونے پر گرفتار کیا جا سکتا ہے۔ امن و امان کی بگڑتی صورتحال کے پیش نظر سانتا مونیکا شہر میں کرفیو نافذ کر دیا گیا ہے۔

آگ کے نتیجے میں کم از کم 10 افراد جاں بحق ہو چکے ہیں، جب کہ لاکھوں افراد کو اپنے گھر چھوڑنے پر مجبور ہونا پڑا ہے۔ ان میں امریکی فلمی صنعت کی کئی مشہور شخصیات بھی شامل ہیں کیونکہ آگ ہالی ووڈ ہلز تک پہنچ چکی ہے۔

حالیہ اطلاعات کے مطابق، لاس اینجلس کے تقریباً ایک لاکھ گھروں اور دفاتر کو بجلی کی فراہمی معطل ہو چکی ہے۔ فائر فائٹرز کا کہنا ہے کہ خشک اور گرم موسم کی موجودہ صورتحال آئندہ ہفتے تک جاری رہنے کی توقع ہے، جس سے آگ پر قابو پانے میں مزید مشکلات پیش آئیں گی۔ اگر ہوائیں تیز ہوئیں تو آگ بجھانے کے لیے فضائی کارروائی بھی متاثر ہو سکتی ہے۔