جاپانی وزیر اعظم شیگرو ایشیبا عہدے سے مستعفی، انتخابی شکست اور پارٹی تقسیم کے دباؤ کا اثر

جاپان کے وزیر اعظم شیگرو ایشیبا نے حکمراں لبرل ڈیموکریٹک پارٹی (ایل ڈی پی) میں بڑھتی تقسیم سے بچنے کے لیے استعفیٰ دینے کا فیصلہ کیا ہے۔ وہ صرف ایک سال قبل وزارتِ عظمیٰ کے منصب پر فائز ہوئے تھے۔ جولائی میں ہونے والے پارلیمانی انتخاب میں ایل ڈی پی کو بھاری شکست کا سامنا کرنا پڑا، جس کے بعد ان کے استعفیٰ کا مطالبہ تیز ہو گیا۔ آخرکار 7 ستمبر کو ایشیبا نے اپنا عہدہ چھوڑ دیا۔ گزشتہ ایک ماہ سے وہ پارٹی کے اندر دائیں بازو کے مخالف دھڑوں کے دباؤ کا مقابلہ کرتے رہے، مگر ایوانِ بالا کی 248 نشستوں میں اکثریت نہ ملنے نے ان کی پوزیشن کمزور کر دی۔

لبرل ڈیموکریٹک پارٹی (ایل ڈی پی) میں 8 ستمبر کو قیادت کا انتخاب ہونا تھا۔ اس معاملہ پر فیصلہ لینے سے ایک روز قبل ہی ایشیبا نے استعفیٰ دے کر سب کو چونکا دیا۔ ایشیبا کے استعفیٰ کے بعد جاپان میں اس وقت تک سیاسی غیر یقینی کی صورتحال رہے گی، جب تل کہ ایل ڈی پی کسی جانشین کا انتخاب نہیں کر لیتی۔ کئی ایل ڈی پی اراکین پارلیمنٹ خود کو اگلے وزیر اعظم کے طور پر پیش کرنے کی کوشش کر رہے ہیں۔ حالانکہ پارٹی کے کسی بھی رکن پارلیمنٹ کو اپنی امیدواری کے لیے کم از کم 20 دیگر اراکین پارلیمنٹ کی حمایت کی ضرورت ہوگی۔

پارٹی کا لیڈر منتخب ہونے کے بعد امیدوار کو وزیر اعظم بننے کے لیے پارلیمانی ووٹ حاصل کرنا ہوگا۔ چونکہ ایل ڈی پی کی زیر قیادت اتحاد اپنی اکثریت کھو چکا ہے، پھر بھی ایوان زیریں میں اس کی سیٹوں کا حصہ سب سے زیادہ ہے، جس کی وجہ سے اس کے امیدوار کے جیتنے کی امید تو ہے، لیکن اس کی کوئی گارنٹی نہیں ہے۔ ایل ڈی پی کے اگلے لیڈر کی اولین ترجیح حکمراں اتحاد کے لیے حمایت حاصل کرنے کی ہوگی۔ ایشیبا نے اکتوبر 2024 میں جب اقتدار سنبھالا تھا، تب بھی پارٹی کے پاس اکثریت نہیں تھی۔ اس لیے 1955 میں قیام کے بعد پہلی بار ایل ڈی پی کو مخلوط حکومت بنانی پڑی تھی۔

وزیر اعظم کے عہدہ سے شیگرو ایشیبا کے استعفیٰ کے بعد ممکنہ وزیر اعظم کے امیدواروں میں سابق وزیر داخلہ سانائے تاکائیچی، وزیر زراعت شنجیرو کوئزومی اور اقتصادی سلامتی کے سابق وزیر تاکایوکی کوبایشی شامل ہیں۔ فی الحال، موجودہ چیف کابینہ سکریٹری یوشیماسا حیاشی اور وزیر خزانہ کاتسونوبو کاتو بھی شیگرو ایشیبا کے جانشین بن سکتے ہیں۔