روس-یوکرین جنگ کا اندیشہ، تباہی سے بچنے کے لیے حکومت ہند نے ہندوستانیوں کو یوکرین چھوڑنے کا دیا مشورہ

روس اور یوکرین کے درمیان گزشتہ کئی دنوں سے رسہ کشی کا ماحول قائم ہے اور دونوں ممالک کے درمیان جنگ کا خطرہ بڑھتا جا رہا ہے۔ ایک طرف جہاں یوکرین کے صدر نے اپنے فیس بک پوسٹ کے ذریعہ دعویٰ کرتے ہوئے کہا کہ کل روس کی طرف سے یوکرین پر حملہ کیا جا سکتا ہے، وہیں امریکہ کی طرف سے بھی بغیر کسی تنبیہ کے روس کی طرف سے حملہ کیے جانے کا اندیشہ ظاہر کیا گیا ہے۔

ان سب کے درمیان ہندوستان نے بھی ایڈوائزری جاری کر اپنے شہریوں کو یوکرین چھوڑنے کے لیے کہہ دیا ہے۔ راجدھانی کیو واقع ہندوستانی سفارتخانہ نے یوکرین پر روسی حملہ کے منڈلاتے خطرے کے درمیان وہاں واقع ہندوستانی طلبا، خصوصاً ان طلبا کو جن کا رہنا ضروری نہیں ہے، وطن واپسی کا مشورہ دیا ہے۔ جو لوگ یوکرین میں رکے رہیں گے انھیں سفارت خانہ کے رابطہ میں رہنا ہوگا۔

دوسری طرف میڈیا رپورٹس کی مانیں تو روس اور یوکرین کے درمیان سرحد پر کشیدگی برقرار ہے۔ روس نے یوکرین کی سرحد پر اسلحوں اور فوجیوں کی بڑی تعداد کو تعینات کر دیا ہے۔ میڈیا رپورٹس میں دعویٰ کیا جا رہا ہے کہ یوکرین کی سرحد پر 1.3 لاکھ فوجیوں کی تعیناتی کی گئی ہے۔ ساتھ ہی روس نے ٹینک، کثیر اسلحہ اور میزائلوں کو بھی یوکرین کی طرف تعینات کر دیا ہے۔ روس نے یوکرین کو تین طرف سے گھیر لیا ہے۔