ذاکر حسین اسکول میں ’شکشا شری‘ ایوارڈ سے سرفراز پرنسپل ڈاکٹر معروف کا استقبالیہ

نئی دہلی: دہلی کے شمال مشرق علاقے جعفر آباد میں واقع ڈاکٹر ذاکر حسین میموریل سینئر سیکنڈری اسکول کے پرنسپل ڈاکٹر محمد معروف خاں کو ’شکشا شری‘ ایوارڈ سے سرفراز کیا گیا ہے۔ یوم اساتذہ کے موقع پر انہیں اس ایوارڈ سے ’اِنڈو-نیپال سمرستا آرگنائزیشن‘ کی جانب سے نوازا گیا۔ ایوارڈ کا اعلان ہونے کے بعد سے ہی شہر کے مختلف اداروں اور تنظیموں میں خوشی کی لہر دوڑ گئی اور ستائش و مبارکباد کا سلسلہ ہنوز جاری ہے۔

اسی سلسلے میں آل انڈیا یونانی طبی کانفرنس دہلی کے صدر، نیلم دوا خانہ نیو سیلم پور اور یونانی سے وابستہ مختلف تنظیموں کے سربراہ حکیم امام الدین ذکائی نے ہمراہ مختلف مشاہیر کے پرنسپل ڈاکٹر محمد معروف خان کو ڈاکٹر ذاکر حسین اسکول کے احاطہ میں مبارکباد پیش کرتے ہوئے ان کی گل پوشی کی۔

اس مختصر تقریب میں یکے بعد دیگرے کارکنان نے پھول اور گلدستہ پیش کیے۔ چند حضرات نے موصوف سے اپنے تعلقات اور ان کی خدمات کا اعتراف بھی کیا۔ ڈاکٹرمحمد معروف نے تمام حاضرین کا شکریہ ادا کرتے ہوئے کہا کہ یہ تمام اعزازات آپ تمام اہلِ علاقہ کی دعاؤں، تعاون اور توقعات کا ثمرہ ہیں اور وہ مستقبل میں بھی سبھی لوگوں سے اسی طرح کی سرپرستی کرتے رہنے کی امید کرتے ہیں۔

واضح رہے کہ پرنسپل ڈاکٹر محمد معروف خان کو یہ ایوارڈ ان کی 35سالہ تعلیمی اور تدریسی خدمات کے اعتراف میں دیا گیا ہے۔ خاص بات یہ ہے کہ اس ایوارڈ کے لئے دہلی شہر سے صرف محمد معروف کا انتخاب کیا گیا ہے۔ ایوارڈ دیئے جانے کا فیصلہ سابق وائس چانسلر، علی گڑھ مسلم یونیورسٹی پروفیسر محمد شبیر کی جانب سے کیا گیا۔ اس موقع پر اسکول عملہ، سینئر اساتذہ اور نائب پرنسپل ریاض الحسن بھی موجود تھے۔