رمضان میں بنائیں خوشبودار قیمہ پلاؤ، پیش خدمت ہے مکمل ترکیب

قیمہ پلاؤ برصغیر کا ایک نہایت مقبول اور خوشبودار پکوان ہے جو اپنی سادہ مگر لذیذ ترکیب کی وجہ سے ہر گھر میں پسند کیا جاتا ہے۔ خوشبودار باسمتی چاول، تازہ قیمہ اور خوشبو دار گرم مسالوں کے امتزاج سے تیار ہونے والا یہ پلاؤ ذائقہ اور خوشبو دونوں میں منفرد ہوتا ہے۔ عام طور پر یہ کھانا گھریلو دعوتوں، خاندانی تقریبات یا روزمرہ کے کھانے میں شوق سے بنایا جاتا ہے، لیکن رمضان میں افطار کے وقت بہت پسندیدہ ہے۔ قیمہ پلاؤ کی خاص بات یہ ہے کہ اسے زیادہ پیچیدہ تیاری کے بغیر بھی نہایت مزیدار بنایا جا سکتا ہے۔ رائتہ، سلاد یا اچار کے ساتھ پیش کیا جائے تو اس کا ذائقہ مزید دوبالا ہو جاتا ہے۔

اجزاء

• باسمتی چاول: 2 کپ

• قیمہ (بھینس یا بکرے کا): 300 گرام

• پیاز: 2 عدد (باریک کٹی ہوئی)

• ٹماٹر: 1 عدد (اختیاری)

• ادرک لہسن کا پیسٹ: 1 کھانے کا چمچ

• دہی: نصف کپ

• ہری مرچ: 2 عدد

• دارچینی: 1 ٹکڑا

• بڑی الائچی: 1 عدد

• سبز الائچی: 4-3 عدد

• لونگ: 4-5 عدد

• تیز پتہ: 1 عدد

• زیرہ: 1 چائے کا چمچ

• لال مرچ پاؤڈر: 1 چائے کا چمچ

• ہلدی: نصف چائے کا چمچ

• نمک: حسب ذائقہ

• تیل یا گھی: 4 کھانے کے چمچ

• ہرا دھنیا اور پودینہ: تھوڑا سا

• پانی: تقریباً 4 کپ

بنانے کا طریقہ

سب سے پہلے چاولوں کو اچھی طرح دھو کر تقریباً 30-20 منٹ کے لیے بھگو دیں۔ ایک دیگچی میں تیل یا گھی گرم کریں اور اس میں زیرہ، دارچینی، لونگ، بڑی و سبز الائچی اور تیز پتہ ڈال کر ہلکا سا تلیں۔ اب کٹی ہوئی پیاز ڈال کر سنہری ہونے تک فرائی کریں۔ اس کے بعد ادرک لہسن کا پیسٹ ڈال کر ایک منٹ بھونیں۔ قیمہ شامل کریں اور اچھی طرح بھونیں یہاں تک کہ اس کا رنگ بدل جائے۔ اب نمک، لال مرچ، ہلدی اور دہی ڈال کر چند منٹ تک پکائیں۔ اگر چاہیں تو کٹا ہوا ٹماٹر اور ہری مرچ بھی شامل کریں اور تھوڑی دیر دَم دیں۔ اب اس میں بھگوئے ہوئے چاول اور پانی شامل کریں اور اچھی طرح ملا دیں۔ درمیانی آنچ پر پکائیں جب تک پانی تقریباً خشک نہ ہو جائے۔ آخر میں ہرا دھنیا اور پودینہ ڈال کر ہلکی آنچ پر 10 منٹ دَم دے دیں۔

آپ کا خوشبودار اور لذیذ قیمہ پلاؤ تیار ہے۔ اب اس قیمہ پلاؤ کو گرم گرم رائتہ، سلاد یا اچار کے ساتھ پیش کریں۔