امریکی ٹی ٹوینٹی عالمی کپ ٹیم میں ہندوستانی اور پاکستانی نژاد کھلاڑی!

2026 کے ٹی ٹوینٹی عالمی  کپ کے لیے امریکی ٹیم کا اعلان کر دیا گیا ہے۔ گجرات کے آنند میں پیدا ہونے والے 32 سالہ کھلاڑی مونانک پٹیل کو اس ٹیم کا کپتان مقرر کیا گیا ہے۔ وہ 2024 کے ٹی ٹوینٹی عالمی کپ میں ٹیم کے کپتان تھے۔ دلچسپ بات یہ ہے کہ اس امریکی ٹیم میں کئی کھلاڑی ہندوستانی اور پاکستانی نژاد ہیں۔

اس بار اعلان کردہ امریکی ٹیم کے مکمل اسکواڈ میں 2024 کا ٹی ٹوینٹی عالمی  کپ کھیلنے والے 10 کھلاڑیوں کو بھی دہرایا گیا ہے۔ مزید برآں سری لنکا کے لیے بین الاقوامی کرکٹ کھیلنے والے شیہان جے سوریا کو بھی ٹیم میں شامل کیا گیا ہے۔ 34 سالہ شیہان سری لنکا کے لیے 12 ون ڈے اور 18 ٹی ٹوینٹی انٹرنیشنل کھیل چکے ہیں۔

مونانک پٹیل، جے سی سنگھ، ملند کمار، سیتیجا مکملا، سنجے کرشنامورتی، ہرمیت سنگھ، نوستش کینجگے، سوربھ نیتراولکر، اور شبھم رنجن ہندوستانی نژاد ہیں۔  جبکہ ٹیم میں تین پاکستانی نژاد کھلاڑی بھی شامل ہیں جن میں شایان جہانگیر، علی خان، اور محمد محسن ہیں۔ وہ پاکستان سے تارکین وطن ہیں اور ٹیم کی تیز گیند بازی اور بیٹنگ میں اپنا حصہ ڈالتے ہیں۔

اس ٹیم میں اینڈریز گاس اور شیڈلی وین شالک وِک بھی شامل ہیں جو کہ جنوبی افریقی نژاد ہیں۔ اس کا مطلب ہے کہ اس امریکی ٹیم میں ہندوستانی نژاد، تین پاکستانی نژاد، ایک سری لنکن نژاد اور دو جنوبی افریقی نژاد کھلاڑی ہیں۔ دلچسپ بات یہ ہے کہ اس ٹیم میں کوئی امریکی نژاد کھلاڑی نہیں ہے۔