ہینری کی دھماکہ خیز اننگز کی وجہ سے یوپی واریئرز نے پہلی فتح کا مزہ چکھا

پہلے بلے بازی کرتے ہوئے یوپی واریئرز نے 9 وکٹ پر 177 رنز کا چیلنجنگ اسکور بنایا جس کے جواب میں دہلی کیپٹلس 19.3 اوور میں 144 رن پر آل آؤٹ ہوگئی۔ یوپی کی جیت کی ہیروہینری تھیں، جنہوں نے اپنی بہادر اننگز سے یوپی کی امیدیں جگائیں، جبکہ بعد میں کرانتی گوڑ (25 رن پر چار وکٹ) اور گریس ہیرس (15 رن پر چار وکٹ) نے دہلی کو باہر کرنے میں کوئی کسر نہیں چھوڑی۔

دہلی کے لیے، جمیمہ روڈریگس (56) نے اپنے انداز میں بلے بازی کی، اپنی 35 گیندوں کی اننگز میں آٹھ چوکے اور ایک چھکا لگایا، لیکن مڈل آرڈر ان کا ساتھ دینے میں ناکام رہا اور دہلی کے سات کھلاڑی ڈبل فیگر تک پہنچنے میں ناکام رہے۔ اس سے قبل شفالی ورما نے 24 رنز بنائے لیکن اِن فارم مین لاننگ (5) کا بلا آج نہیں چلا۔

اس سے قبل ایم چناسوامی اسٹیڈیم میں ایک مرحلے پر یوپی کے چھ کھلاڑی 89 رنز بنا کر پویلین لوٹ چکے تھے اور کھیل کے چند اوور باقی تھے۔ ایسے میں دہلی کی گیند باز ہینری کے بلے سے نکلنے والی آگ سے جھلس گئیں۔ ہینری نے میدان کے چاروں طرف چوکے اور چھکے لگائے اور یوپی کا اسکور بورڈ ہوا سے باتیں کرنے لگا۔ ہینری نے اپنی دھماکہ خیز اننگز کے دوران آٹھ زبردست چھکے اور دو چوکے لگائے۔ وہ یوپی کی اننگز کی آخری گیند پر جاناسن کا شکار بنیں۔

ہینری کے علاوہ کرن نوگیرے (17)، دیپتی شرما (13)، تالیہ میک گرا (24)، شویتا سہراوت (11) اور سوفی ایکلیسٹون (12) ڈبل فیگرز تک پہنچنے والی دوسرے بلے باز تھیں۔ دہلی کے لیے جیس جانسن نے 31 رنز دے کر یوپی کی چار بلے بازوں کا وکٹ لیا جبکہ اروندھتی ریڈی اور ماریزان کپ نے دو دو وکٹ حاصل کئے۔