انڈر-19 ایشیا کپ: ہندوستان-پاکستان کی سیمی فائنل میں شکست، بنگلہ دیش اور یو اے ای کھیلے گا فائنل

دبئی میں کھیلے جا رہے انڈر-19 ایشیا کپ کے فائنل سے ہندوستان اور پاکستان دونوں کی ہی ٹیمیں باہر ہو گئی ہیں۔ آج کھیلے دو سیمی فائنل مقابلوں میں بالترتیب یو اے ای نے پاکستان کو اور بنگلہ دیش نے ہندوستان کو شکست دے کر فائنل میں جگہ بنائی۔ فائنل مقابلہ 17 دسمبر کو کھیلا جائے گا اور یہ کرکٹ شیدائیوں کے لیے حیران کرنے والا ہے کہ دو بڑی ٹیمیں فائنل مقابلے سے باہر ہو گئی ہیں۔

آج پہلا سیمی فائنل مقابلہ پاکستان انڈر-19 اور یو اے ای انڈر-19 ٹیموں کے درمیان کھیلا گیا۔ پاکستانی کپتان سعد بیگ نے ٹاس جیت کر پہلے گیندبازی کرنے کا فیصلہ کیا تھا۔ یہ فیصلہ درست بھی ثابت ہوا کیونکہ یو اے ای کی ٹیم 47.5 اوورس میں محض 193 رن بنا کر آؤٹ ہو گئی۔ لیکن جب پاکستان کی بلے بازی شروع ہوئی تو کم ہی بلے باز وکٹ پر ٹھہرنے میں کامیاب ہو سکے۔ پوری پاکستانی ٹیم 49.3 اوورس میں 182 رنوں پر آؤٹ ہو گئی اور 11 رنوں سے شکست کا سامنا کرنا پڑا۔

یو اے ای کی طرف سے کپتان ایان افضل خان نے 57 گیندوں پر 55 رنوں کی بہترین اننگ کھیلی تھی جس کے لیے انھیں پلیئر آف دی میچ کا ایوارڈ دیا گیا۔ ایان کے علاوہ اریانش شرما (70 گیندوں پر 46 رن) اور ایتھن ڈیسوزا (63 گیندوں پر 37 رن) نے بھی اہم اننگ کھیلی۔ پاکستانی گیندباز عبید شاہ نے 9.5 اوورس میں 44 رن دے کر سب سے زیادہ 4 وکٹ لیے۔ پاکستانی بلے بازی کی بات کی جائے تو کپتان سعد بیگ نے 52 گیندوں پر 50 رن، اذان اویس نے 71 گیندوں پر 41 رن اور عامر حسن نے 47 گیندوں پر 27 رن کی اننگ کھیلی۔ دیگر کوئی بلے باز بڑا اسکور نہیں بنا سکا۔ علی اسفند 61 گیندوں پر 16 رن بنا کر ناٹ آؤٹ رہے۔ یو اے ای کی طرف سے گیندبازی میں 2-2 وکٹ ایمن احمد اور ہاردک پائی نے لیے، جبکہ 1-1 وکٹ امید رحمن، دھرو پراشر اور عمار بدامی نے لیے۔

دوسرے سیمی فائنل کی بات کی جائے تو بنگلہ دیش کی انڈر-19 ٹیم نے ہندوستان کی انڈر-19 ٹیم کو 43 گیندیں باقی رہتے 4 وکٹ سے شکست دے دی۔ بنگلہ دیش کے کپتان نے ٹاس جیت کر پہلے گیندبازی کرنے کا فیصلہ کیا تھا۔ ہندوستان کی بلے بازی انتہائی مایوس کن رہی کیونکہ 61 رن پر ہی 6 وکٹ آؤٹ ہو گئے تھے۔ مشکل وقت میں مشیر خان (61 گیندوں پر 50 رن) اور مروگن ابھشیک (74 گیندوں پر 62 رن) نے ٹیم کو سنبھالا، لیکن ان دونوں کے آؤٹ ہوتے ہی پوری ٹیم لڑکھڑا گئی۔ 42.4 اوورس میں ہندوستانی ٹیم محض 188 رن بنا سکی۔ بنگلہ دیش کی طرف سے معروف مردھا نے سب سے زیادہ 4 کھلاڑیوں کو آؤٹ کیا۔

جب بنگلہ دیش کی بلے بازی شروع ہوئی تو ہندوستانی گیندبازوں نے حاوی ہونے کی کوشش کی اور محض 34 رن پر 3 وکٹ بھی گرا دیے تھے، لیکن اس کے بعد عارف الاسلام (90 گیندوں پر 94 رن) اور احرار امین (101 گیندوں پر 44 رن) نے میچ کو ہندوستان کی مٹھی میں جانے سے روک دیا۔ بنگلہ دیش کا چوتھا وکٹ 172 رنوں پر گرا تھا اور اس کے بعد مزید 2 وکٹ ہندوستانی گیندبازوں نے لیے، لیکن اسکور بورڈ پر رن اتنے کم تھے کہ جیتنا ممکن نہیں ہو سکا۔ بنگلہ دیش نے 42.5 اوورس میں ہی 6 وکٹ کے نقصان پر 189 رن بنا دیے۔ ہندوستان کی جانب سے 3 وکٹ نمن تیواری نے لیے، جبکہ 2 وکٹ راج لمبانی کے حصے میں آئے۔