’روہت شرما اپنا آخری ٹیسٹ میچ کھیل چکے‘، سڈنی ٹیسٹ سے کپتان کو باہر کیے جانے پر سنیل گواسکر کا رد عمل

ہندوستانی کپتان روہت شرما بارڈر-گواسکر ٹرافی کے پانچویں اور آخری ٹیسٹ میچ میں نہیں کھیل رہے ہیں۔ پہلے سے ہی ایسی خبریں سامنے آ رہی تھیں کہ روہت شرما نے ٹیم کے حق میں یہ مشورہ دیا تھا کہ انھیں سڈنی ٹیسٹ کے پلیئنگ الیون میں شامل نہ کیا جائے۔ کچھ خبریں ایسی بھی آئیں کہ ان کی خراب کارکردگی کو پیش نظر رکھتے ہوئے آرام دینے پر اتفاق رائے قائم ہوا۔ ظاہر ہے ایسے میں روہت شرما کے چاہنے والے جلد ان کے فارم میں واپس آنے اور ٹیسٹ کرکٹ میں پھر سے دبدبہ قائم کرنے کی دعا کریں گے۔ حالانکہ ہندوستان کے سابق مایہ ناز بلے باز سنیل گاوسکر کا کچھ اور ہی ماننا ہے۔ ان کا کہنا ہے کہ روہت شرما اپنا آخری ٹیسٹ میچ کھیل چکے ہیں۔

قابل ذکر ہے کہ ہندوستان نے آسٹریلیا کے پانچویں ٹیسٹ میچ کے لیے پلیئنگ الیون میں 2 تبدیلی کی ہے۔ روہت شرما کی جگہ شبھمن گل کو ٹیم میں شامل کیا گیا ہے اور زخمی تیز گیندباز آکاش دیپ کی جگہ پرسدھ کرشنا کی پلیئنگ الیون میں واپسی ہوئی ہے۔ روہت شرما کی غیر موجودگی میں تیز گیندباز جسپریت بمراہ ٹیم کی کمان سنبھال رہے ہیں۔

بہرحال، روہت شرما کے ٹیسٹ کیریئر سے متعلق کہنا ہے کہ ہندوستان کو طویل مدت تک اب ٹیسٹ میچ نہیں کھیلنا ہے، اس لیے ٹیم اب روہت شرما سے آگے بڑھ چکی ہے۔ انھوں نے کہا کہ سلیکشن کمیٹی اب کسی ایسے کھلاڑی کا انتخاب کرے گی جو 2027 ڈبلیو ٹی سی کے اگلے سائیکل تک سرگرم رہ سکے۔ گواسکر نے یہ بیان ایک اسپورٹس چینل پر دیا ہے۔ انھوں نے اپنے بیان میں یہ بھی جوڑا ہے کہ ہندوستانی ٹیم جون 2025 میں کھیلنے جانے والے ڈبلیو ٹی سی کے فائنل میں پہنچتی دکھائی نہیں دے رہی۔ انھوں نے کہا کہ ’’مجھے ایسا لگتا ہے کہ ہندوستان ڈبلیو ٹی سی فائنل کے لیے کوالیفائی نہیں کر پائے گا۔ میرا یہ بھی ماننا ہے کہ روہت ملبورن میں اپنا آخری ٹیسٹ میچ کھیل چکے ہیں۔‘‘ پھر وہ کہتے ہیں کہ ’’ڈبلیو ٹی سی کا اگلا سائیکل ہندوستان کے لیے انگلینڈ سیریز سے شروع ہوگا، اس لیے وہ کسی ایسے کھلاڑی کی تلاش کریں گے جو 2027 تک سرگرم رہے۔ شاید ہم نے ملبورن میں روہت کو آخری بار ٹیسٹ کھیلتے ہوئے دیکھ لیا ہے۔‘‘

گواسکر کا کہنا ہے کہ سیریز کے آخری ٹیسٹ میچ کے لیے روہت شرما کو آرام دینے کے پیچھے چیف سلیکٹر اجیت اگرکر کا کردار یقینی طور پر رہا ہوگا۔ ہندوستان 5 میچوں کی ٹیسٹ سیریز میں فی الحال 2-1 سے پیچھے چل رہا ہے، اور اسے اگر ڈبلیو ٹی سی فائنل کی دوڑ میں بنے رہنا ہے تو ہر حال میں سڈنی ٹیسٹ میں فتح حاصل کرنی ہوگی۔

گواسکر نے اپنے بیان میں کہا ہے کہ اگرکر سلیکشن کمیٹی کا حصہ ہیں۔ ہندوستانی کرکٹ میں جو بھی ہوتا ہے، سلیکشن کمیٹی ہی طے کرتی ہے۔ وہی فیصلہ کرتی ہے کہ ٹیم میں کس کھلاڑی کو جگہ ملے گی۔ جب آپ بیرون ملکی دورے پر جاتے ہیں تو کپتان، کوچ اور چیف سلیکٹر چیزوں کو غور سے دیکھتے ہیں اور فیصلہ کرتے ہیں۔ اگرکر اس وقت سڈنی میں موجود ہیں، اس لیے روہت کو باہر رکھنے کے فیصلے میں ان کی حمایت بھی شامل ہوگی۔ ہو سکتا ہے کہ ٹیم کے کچھ سینئر کھلاڑیوں سے بھی رائے لی گئی ہوگی۔