روہت اور کوہلی کی واپسی سے ٹیم انڈیا مضبوط، جنوبی افریقہ کے خلاف ون ڈے سیریز میں بدلہ لینے کا عزم

رانچی: جے ایس سی اے اسٹیڈیم رانچی میں 30 نومبر کو ہندوستان اور جنوبی افریقہ کے درمیان تین میچوں کی ون ڈے سیریز کا پہلا مقابلہ کھیلا جائے گا۔ یہ سیریز اس لیے بھی خاص اہمیت رکھتی ہے کہ ٹیم انڈیا کے دو بڑے ستارے روہت شرما اور وراٹ کوہلی طویل وقفے کے بعد ون ڈے فارمیٹ میں واپسی کر رہے ہیں۔ ان دونوں تجربہ کار بلے بازوں کی موجودگی سے ہندوستانی ٹیم کے بیٹنگ آرڈر میں زبردست مضبوطی آئے گی اور میزبان ٹیم کا حوصلہ بھی بلند ہوا ہے۔

اس سیریز میں ٹیم کی کپتانی کے ایل راہل کے ہاتھوں میں ہوگی۔ البتہ ٹیم شبھمن گل، شریئس ایر اور جسپریت بمراہ جیسے اہم کھلاڑیوں کی خدمات کے بغیر میدان میں اترے گی، جس سے نئے کھلاڑیوں کو اپنی صلاحیت دکھانے کا اچھا موقع ملے گا۔ دونوں ٹیموں نے میچ سے قبل بھرپور پریکٹس سیشن کیے اور اپنے کمبی نیشن کو بہتر بنانے کی کوشش کی تاکہ اپنی بہترین کارکردگی سامنے لا سکیں۔

ہندوستان اور جنوبی افریقہ کے درمیان ون ڈے تاریخ ہمیشہ دلچسپ رہی ہے۔ دونوں ٹیمیں اب تک 58 ون ڈے میچ کھیل چکی ہیں، جن میں جنوبی افریقہ نے 30 مقابلے جیتے جبکہ ہندوستان 27 بار فاتح رہا ہے۔ اس بار ہندوستان نہ صرف سیریز جیتنے کی پوزیشن میں ہے بلکہ 3-0 سے کلین سوئپ کر کے دنیا کو یہ پیغام دینا چاہتا ہے کہ گھریلو حالات میں وہ کسی بھی حریف کے لیے سخت چیلنج ہے۔ 2009 کے بعد سے ہندوستان نے اپنے گھر میں ون ڈے میچوں میں 71 فیصد فتوحات حاصل کی ہیں، جو ٹیم کی مضبوطی کا بڑا ثبوت ہے۔

گزشتہ برس بھی دونوں ٹیموں نے تین میچوں کی ون ڈے سیریز کھیلی تھی، جس میں ہندوستان نے 2-1 سے کامیابی درج کی تھی۔ رواں سیریز نہ صرف ٹیسٹ ہار کا حساب برابر کرنے کا موقع فراہم کرتی ہے بلکہ روہت شرما اور وراٹ کوہلی کے لیے بھی ایک خاص سنگ میل ثابت ہو سکتی ہے۔ دونوں کھلاڑی بین الاقوامی کرکٹ میں سب سے زیادہ میچ کھیلنے والے ہندوستانی بلے بازوں کی فہرست میں شامل ہونے جا رہے ہیں۔ ان کی شراکت داری سے ٹیم کو نہ صرف استحکام ملے گا بلکہ نوجوان کھلاڑیوں کو بھی رہنمائی حاصل ہوگی۔

سیریز کے باقی دو میچ 3 دسمبر کو رائے پور اور 6 دسمبر کو وشاکھاپٹنم میں کھیلے جائیں گے۔ شائقین کرکٹ اس سیریز کو بے حد اہم سمجھ رہے ہیں کیونکہ یہ مقابلہ ٹیم انڈیا کی طاقت، روہت اور کوہلی کی فارم اور جنوبی افریقہ کے خلاف غلبہ دوبارہ قائم کرنے کی بڑی آزمائش ہے۔

(ان پٹ یو این آئی)