آئی پی ایل 2025: رائل چیلنجرس بنگلورو کے کپتان بنائے گئے رجت پاٹیدار، وراٹ کوہلی نے دی مبارک باد

رائل چیلنجرس بنگلورو نے جمعرات کو آئی پی ایل 2025 کے لیے رجت پاٹیدار کو ٹیم کی کمان سونپ دی ہے۔ اس سلسلے میں آر سی بی نے سوشل میڈیا پوسٹ اور لائیو سیشن کے ذریعہ رجت پاٹیدار کو ٹیم کا نیا کپتان بنائے جانے کا اعلان کیا۔

آر سی بی نے اپنے سوشل میڈیا ہینڈلس پر ایک ویڈیو شیئر کرتے ہوئے کیپشن لکھا، "آر سی بی کے اگلے کپتان ہیں۔۔۔ کھیل کے کئی عظیم کھلاڑیوں نے آر سی بی کے لیے ایک وسیع کپتانی وراثت بنائی ہے اور اب اس متوجہ، بے خوف اور بہترین کھلاڑی کے لیے ہمیں فخر کی طرف لے جانے کا وقت آ گیا ہے۔ دباؤ میں پُرسکون اور چیلنجز کا سامنا کرنے کی صلاحیت، جیسا کہ انہوں نے ہمیں ماضی میں دکھایا ہے، آر سی بی کے لیے گیم چینجر ثابت ہوگی۔ خواتین و حضرات، چلیے اسے ہمارے اسپن بیشر کے سنیں، جو پُرسکون اور نرم ہے۔ رجت پاٹیدار۔"

آر سی بی کے اسٹار کھلاڑی اور سابق کپتان وراٹ کوہلی نے بھی ایک ویڈیو جاری کرکے رجت پاٹیدار کو نیا کپتان بنائے جانے پر مبارک باد پیش کی ہے۔ انہوں نے کہا، "رجت سب سے پہلے آپ کو نیک خواہشات! آپ اس فرنچائزی میں جس طرح بڑھے اور جس طرح آپ نے مظاہرہ کیا، اس سے آپ نے ملک بھر کے آر سی بی فینس کے دلوں میں جگہ بنائی، وہ واقعی آپ کو کھیلتے دیکھنے کے لیے پُر جوش ہیں۔ آپ کپتان بننے کے حقدار ہیں۔"

کوہلی نے آگے کہا، "میں اور پوری ٹیم آپ کے پیچھے کھڑی ہے اور آپ کو ہماری پوری حمایت حاصل ہے۔ یہ بڑی ذمہ داری ہے۔ میں نے طویل وقت تک کپتانی کی ہے۔ فاف ڈوپلیسس نے گزشتہ سال کپتانی کی۔ آپ کو اس ذمہ داری کو آگے لے جاتے ہوئے دیکھنا، یہ آپ کے لیے بڑے اعزاز کی بات ہے۔ آپ نے کپتانی حاصل کرنے کا اعزاز کمایا ہے۔ اور مجھے یقین ہے کہ آپ طاقت کے ساتھ آگے بڑھیں گے۔"

واضح ہو کہ آر سی بی نے بدھ کو بتایا تھا کہ جمعرات کو آئندہ سیزن کے لیے کپتان کے نام کا اعلان ہوگا۔ اس وقت قیاس لگایا جا رہا تھا کہ کوہلی دوبارہ ٹیم کے کپتان بنیں گے، ویسے یہ بھی رپورٹ تھی کہ اگر کوہلی کپتانی کرنے سے انکار کرتے ہیں تو رجت پاٹیدار اور کرونال پانڈیا کے نام دوڑ میں سب سے آگے ہیں۔ آر سی بی نے آج رجت پاٹیدار کے نام پر مہر لگا دی۔

رجت پاٹیدار کی بات کی جائے تو انہوں نے صرف 4 سال میں ہی اپنی قسمت کو چمکا دیا ہے۔ انہوں نے 2021 میں آر سی بی کی طرف سے آئی پی ایل کا ڈیبیو کیا تھا۔ انہوں نے ابھی تک 27 آئی پی ایل میچ کھیلے ہیں جس میں 799 رن بنائے۔ ان کا اوسط 37.74 ہے جبکہ اسٹرائک ریٹ 158.85 رہا ہے۔ پاٹیدار گھریلو کرکٹ میں مدھیہ پردیش کی ٹیم کی کمان سنبھال چکے ہیں۔ آئی پی ایل کا آٹھواں سیزن اگلے مہینے شروع ہو رہا ہے۔ اب دیکھنا یہ ہے کہ 17 سال سے آئی پی ایل جیتنے کا خواب دیکھ رہی آر سی بی کو اس بار پاٹیدار کی کپتانی میں وہ خوشگوار لمحہ حاصل ہوگا یا نہیں۔