پاکستانی ٹیم کولمبو کے لئے دو فروری کو روانہ ہوگی!

پاکستان کرکٹ بورڈ (پی سی بی) نے 2026 کے ٹی ٹوینٹی عالمی  کپ کے بائیکاٹ سے متعلق قیاس آرائیوں کو عملی طور پر ختم کر دیا ہے۔ بورڈ نے دو فروری کی صبح کولمبو، سری لنکا کے لیے روانہ ہونے کے لیے اپنی ٹیم کو مکمل طور پر تیار کر لیا ہے۔ اس سے یہ واضح ہوتا ہے کہ نہ تو ٹورنامنٹ کا بائیکاٹ کیا جائے گا اور نہ ہی پاکستان 15 فروری کو ہندوستان کے خلاف ہائی وولٹیج میچ سے دستبردار ہو گا۔

خبر رساں ایجنسی کے مطابق پی سی بی کے قریبی ذرائع نے بتایا کہ عالمی  کپ کے لیے سفری پروگرام کو حتمی شکل دے دی گئی ہےاوراس نےبائیکاٹ کی کالو ں کو  بے بنیاد قرار دیا ہے۔ ذرائع کے مطابق، پی سی بی نے بنگلہ دیش کرکٹ بورڈ (بی سی بی) کے ہندوستان میں کھیلنے کے حوالے سے سیکیورٹی خدشات کی حمایت کی، لیکن مزید آگے جانے سے آئی سی سی کے ساتھ اس کی پوزیشن کمزور ہوگی۔

قابل ذکر ہے کہ بی سی سی آئی، پی سی بی، اور آئی سی سی کے درمیان سہ فریقی معاہدے کے تحت، 2027 تک ہندوستان اور پاکستان کے درمیان آئی سی سی کے تمام میچز غیر جانبدار مقامات پر کھیلے جائیں گے۔ نتیجتاً پاکستان کے عالمی  کپ کے تمام میچز بشمول فائنل (اگر ٹیم کوالیفائی کرتی ہے) تو  سری لنکا میں منعقد ہوں گے۔

ذرائع نے یہ بھی بتایا کہ پی سی بی کے چیئرمین محسن نقوی نے وزیراعظم شہباز شریف سے ملاقات میں واضح کیا کہ کسی بھی فیصلے سے پاکستان کرکٹ کا مستقبل محفوظ ہونا چاہیے اور آئی سی سی اور دیگر بورڈز کے ساتھ تعلقات کو نقصان نہیں پہنچنا چاہیے۔

اندرونی ذرائع نے بائیکاٹ کی میڈیا رپورٹس کو افواہوں کے طور پر مسترد کردیا اور کہا  ہےکہ ہندوستانی حکومت کے پاکستان میں کھیلنے سے انکار کا مطلب یہ نہیں ہے کہ ہندوستان اور پاکستان کے میچ غیر جانبدار مقامات پر منعقد نہیں ہوسکتے۔