لیجنڈس لیگ: نہیں ہوگا ہند-پاک مقابلہ، لوگوں کی ناراضگی کے بعد ڈبلیو سی ایل نے میچ کو کیا منسوخ

ورلڈ چمپئن شپ آف لیجنڈس (ڈبلیو سی ایل) میں 20 جولائی کو ہونے والا ہندوستان بمقابلہ پاکستان میچ منسوخ کر دیا گیا ہے۔ اس میچ کو لے کر اٹھے تنازعہ اور ناراضگی کے درمیان منتظمین نے آفیشیل بیان جاری کرتے ہوئے مچ کو منسوخ کرنے کا اعلان کیا۔

ڈبلیو سی ایل نے اپنے بیان میں کہا- ’’ہم ڈبلیو سی ایل میں ہمیشہ سے کرکٹ کو بے حد پیار کرتے آئے ہیں اور ہمارا واحد مقصد شائقین کو کچھ اچھے اور خوشی کے لمحے دینا رہا ہے۔ جب ہمیں پتہ چلا کہ اس سال پاکستان ہاکی ٹیم بھارت آ رہی ہے اور حال ہی میں ہندوستان-پاکستان والی بال میچ سمیت کچھ دیگر کھیلوں میں دونوں ملکوں کے درمیان مقابلے ہو رہے ہیں تو ہم نے سوچا کہ ڈبلیو سی ایل میں ہندوستان-پاکستان کا میچ کروا کر لوگوں کے لیے کچھ یادگار اور خوشی بھرے لمحے بنائے جائیں۔‘‘

بیان میں آگے کہا گیا- ’’لیکن شاید اس کوشش میں ہم کئی لوگوں کے جذبات کو ٹھیس پہنچا بیٹھے۔ اس سے بھی زیادہ، ہم نے ان ہندوستانی کرکٹ لیجنڈس کو غیر آرامدہ حالت میں ڈال دیا جنہوں نے ملک کا نام فخر سے اونچا کیا ہے۔ ساتھ ہی ہم نے ان برانڈس کو بھی متاثر کیا جو صرف کھیل کے تئیں اپنے پیار کی وجہ سے ہماری حمایت کر رہے تھے۔ اسی وجہ سے ہم نے ہندوستان-پاکستان مقابلے کو منسوخ کرنے کا فیصلہ کیا۔‘‘

منتظمین نے ایسے حالات پیش آنے کے لیے معافی مانگتے ہوئے امید ظاہر کی کہ لوگ سمجھیں گے کہ ہمارا مقصد صرف اتنا تھا کہ ہم کرکٹ شائقین کو کچھ خوشی کے لمحے دے سکیں۔‘‘

اس سے پہلے ہندوستان کے کئی سابق کرکٹروں ہربھجن سنگھ، شکھر دھون، سریش رینا اور یوسف پٹھان نے اس میچ سے اپنا نام واپس لے لیا تھا۔ شکھر دھون نے اس سلسلے میں سوشل میڈیا پر اپنا ردعمل ظاہر کرتے ہوئے لکھا تھا- ’میرا ملک میرے لیے سب کچھ ہے اور ملک سے بڑھ کر کچھ نہیں ہوتا۔‘

ادھر شیو سینا (یو بی ٹی) کی رکن پارلیمنٹ پرینکا چترویدی نے ورلڈ چمپئن شپ آف لیجنڈس میں ہندوستان اور پاکستان کا میچ منسوخ ہونے پر اپنا ردعمل ظاہر کرتے ہوئے ٹوئٹ کیا- ’’شکریہ۔ دہشت گردی کے ساتھ کوئی بات چیت نہیں اور ان کھلاڑیوں کے ساتھ کوئی کرکٹ نہیں، جنہوں نے ہمارے ملک کی توہین کی تھی۔ ملک کی اجتماعی آواز پربتوں کو بھی ہلا سکتی ہے۔ ان سبھی کا بڑا شکریہ جنہوں نے پہلگام حملے اور آپریشن سندور کے بعد ہندوستان-پاکستان کرکٹ مقابلوں کی مخالفت کی اور میرے اس میچ کو منسوخ کرنے کے مطالبے کی حمایت کی۔ یہ اب ہو چکا ہے۔ ڈبلیو سی ایل نے ہندوستان-پاکستان میچ کو ڈراپ کر دیا ہے۔ جے ہند۔‘‘