دہلی ٹیسٹ میں ویسٹ انڈیز کے خلاف 5 وکٹ لے کر کلدیپ یادو نے بنایا عالمی ریکارڈ

ہندوستان اور ویسٹ انڈیز کے درمیان 2 ٹیسٹ میچوں کی سیریز کا دوسرا میچ دہلی کے ارون جیٹلی اسٹیڈیم میں جاری ہے۔ میچ کی پہلی اننگ میں کلدیپ یادو نے 26.5 اوورس کی گیندبازی میں 5 وکٹ لے کر عالمی ریکارڈ اپنے نام کر لیا ہے۔ کلدیپ یادو نے ٹیسٹ کرکٹ کی تاریخ میں کسی بائیں ہاتھ کے کلائی کے اسپنر کے ذریعہ سب سے زیادہ 5 وکٹ لینے کے ریکارڈ کی برابری کر لی ہے۔ وہ اب انگلینڈ کے جانی وارڈل کے برابر آ گئے ہیں، جنہوں نے بائیں ہاتھ کے کلائی کے اسپنر کے طور پر گیندبازی کرتے ہوئے اپنے کیریئر میں پانچ بار 5 وکٹ حاصل کیے تھے۔

واضح رہے کہ ہندوستانی ٹیم نے پہلی اننگ 518 رنوں پر ڈکلیئر کر دی تھی۔ اس کے جواب میں ویسٹ انڈیز کی پوری ٹیم پہلی اننگ میں صرف 248 رن بنا کر آؤٹ ہو گئی، اسی وجہ سے ہندوستانی ٹیم نے اسے فالو آن کھیلنے پر مجبور کیا۔ ویسٹ انڈیز کو کم اسکور پر سمیٹنے میں کلدیپ یادو کا بڑا رول رہا۔ انہوں نے 26.5 اوورس کی گیندبازی میں 82 رن دے کر 5 وکٹ حاصل کیے۔

بائیں ہاتھ کے کلائی کے اسپنر کے ذریعہ ٹیسٹ کرکٹ میں سب سے زیادہ ایک اننگ میں 5 وکٹ لینے کا مشترکہ عالمی ریکارڈ ہندوستان کے کلدیپ یادو اور انگلینڈ کے جانی وارڈل کے نام ہے۔ دونوں نے ٹیسٹ کرکٹ میں 5 بار کسی پاری میں میں 5 یا اس سے زائد وکٹ حاصل کرنے کا کارنامہ انجام دیا ہے۔ اس فہرست میں تیسرے نمبر پر جنوبی افریقہ کے پال ایڈمس ہیں، جنہوں نے ٹیسٹ کرکٹ کی ایک پاری میں 4 بار 5 یا اس سے زیادہ وکٹیں حاصل کی ہیں۔

کلدیپ یادو کا ریکارڈ اس لیے خاص ہے کہ انہوں نے صرف 15 ٹیسٹ میں 5 بار ایک اننگ میں 5 یا اس سے زیادہ وکٹ لینے کا کارنامہ کیا ہے۔ جبکہ انگلینڈ کے جانی وارڈل نے 28 میچوں میں یہ مقام حاصل کیا۔ کلدیپ یادو نے رواں ٹیسٹ میچ کی پہلی اننگ میں ایلک ایتھنیز، شائے ہوپ، ٹیون املیک، جسٹن گریوس اور جیڈن سیلس کو آوٹ کر عالمی ریکارڈ قائم کیا۔ کلدیپ یادو اب تک اپنے 15 ٹیسٹ میچوں کی کیریئر میں مجموعی طور پر 65 وکٹ لے چکے ہیں۔ یہ دوسرا موقع ہے جب انہوں نے ویسٹ انڈیز کے خلاف ٹیسٹ میں 5 وکٹ حاصل کی ہے۔