ماہ رمضان میں روزے رکھ کر فارم واپس پانے میں مدد ملی: ہاشم آملہ

برسٹل: جنوبی افریقی کرکٹ ٹیم کے اوپننگ بلے باز ہاشم آملہ نے رمضان المبارک میں ورلڈ کپ کے آغاز پر خوشی کا اظہار کرتے ہوئے کہا ہے کہ روزہ رکھنے سے ذہنی اور روحانی ورزش ہوجاتی ہے۔ آئی سی سی کی ویب سائٹ کے لئے دیئے گئے ایک انٹرویو میں ہاشم آملہ نے کہا کہ روزہ رکھنے سے انہیں اصلاح میں مدد ملتی ہے اور وہ ہمیشہ سے روزے رکھتے رہے ہیں۔

ہاشم آملہ کی گزشتہ کچھ عرصے سے پرفارمنس اچھی نہیں رہی، ورلڈ کپ اسکواڈ میں شمولیت پر بھی کافی سوچ بچار ہوئی تھی، دونوں وارم اپ میچز میں آملہ نے ففٹی پلس اسکور کیے۔

انہوں نے کہا کہ رمضان المبارک سال کا سب سے اچھا مہینہ ہے اور انہیں لگتا ہے کہ اس سے اچھی ذہنی اور روحانی ورزش ہو جاتی ہے۔ انہوں نے کہا کہ رن بنانا ہمیشہ اہم ہوتا ہے، وہ ورلڈ کپ کی فائنل الیون میں رہیں یا نہ رہیں وہ جو کرسکتے ہیں وہ کرتے ہیں اور اس کے بعد جو ہوتا ہے وہ ٹیم کی بھلائی کے لئے ہوتا ہے۔

جنوبی افریقہ کی ٹیم ورلڈ کپ کے 2 وارم اپ میچز کھیل چکی ہے جس میں ہاشم آملہ نے نصف سنچریاں اسکور کی ہیں۔ خیال رہے کہ 2012 میں جنوبی افریقہ کی ٹیم نے رمضان المبارک میں انگلینڈ کا دورہ کیا تھا اور ہاشم آملہ نے روزے رکھ کر نہ صرف میچز میں حصہ لیا تھا بلکہ جنوبی افریقہ کے لئے سب سے زیادہ ٹیسٹ رنز بنانے کا ریکارڈ بھی اپنے نام کیا تھا۔