ویڈیو: ہندوستان کے لوگ خلیج ممالک کے لئے ستون ثابت ہو رہے ہیں، ندیم ماہر

18 مارچ کو ’قومی آواز‘ کے دفتر میں عالمی شہرت یافتہ ادیب ڈاکٹر تقی عابدی اور سید ندیم ماہر کی تشریف آوری ہوئی اور انھوں نے ’پردیس میں اپنا دیس‘ عنوان پر مبنی ایک انتہائی اہم مذاکرے میں شرکت کی۔ اس مذاکرے میں کناڈا سے تعلق رکھنے والے ڈاکٹر تقی عابدی اورتقریباً دو دہائی سے دوحہ، قطر میں مقیم سید ندیم ماہر نے ملک کے مختلف علاقوں میں ہندوستانی تہذیب و ادب کی موجودگی اوران کے ساتھ پیش آنے والے مسائل پر تفصیلی گفتگو کی۔ مذاکرے کی نظامت محترم آصف اعظمی نے کی جب کہ مہمانان کا استقبال ’نیشنل ہیرالڈ گروپ‘ کے چیف ایڈیٹر ظفر آغا نے کیا۔ پروگرام کے آخر میں اظہارِ تشکر کی ذمہ داری ادارہ کے پالیٹیکل ایڈیٹر سید خرم رضا نے نبھائی۔ قابل ذکر ہے کہ اس مذاکرے میں کئی طرح کی ایسی باتیں سامنے آئیں جو نہ صرف دلچسپ تھیں بلکہ حیران کرنے والی بھی تھیں۔ ’قومی آواز‘ کے قارئین کو ان باتوں سے روشناس کرانے کے مقصد سے اس مذاکرے کا ویڈیو تین حصوں میں تقسیم کر کے پیش کیا جا رہا ہے۔

پہلے حصے میں دوحہ، قطر سے تعلق رکھنے والے سید ندیم ماہر کے تجربات و مشاہدات اور ان کا نظریہ آپ کی خدمت میں حاضر ہے، جو ایک بہترین شاعر ہیں اور ہندوستان سے باہر ہندوستانی تہذیب و ثقافت کو فروغ دینے میں پیش پیش ہیں۔ انھوں نے مذاکرے میں موجود سامعین کو بتایا کہ کس طرح ہندوستانی نژاد لوگ سعودی عرب اور دوبئی وغیرہ ممالک کے لیے ایک ستون ثابت ہو رہے ہیں۔ سید ندیم کے مطابق لوگ یہ سمجھتے ہیں کہ ہندوستانی وہاں جا کر مزدوری کرتے ہیں اور کچھ پیسہ کما کر ہندوستان اپنے اہل خانہ کو بھیج دیتے ہیں، لیکن یہ سچ نہیں ہے۔ سچ یہ ہے کہ مزدور طبقہ سے کہیں زیادہ ہندوستانی سعودی اور دوبئی وغیرہ ممالک میں ایڈمنسٹریٹو، اکاؤنٹس، میڈیکل اور ان جیسے دیگر شعبوں میں اپنی خدمات انجام دے رہے ہیں۔ سید ندیم ماہر نے مزید کیا کچھ مذاکرے کے دوران بتایا یہ جاننے کے لیے دیکھیں یہ ویڈیو...