بین الاقوامی کک باکسنگ ٹورنامنٹ میں چھتیس گڑھ کے تین کھلاڑیوں نے طلائی تمغہ پر کیا قبضہ

چتھیس گڑھ کے سرگوجا ضلع کے تین نوجوان کھلاڑیوں نے بین الاقوامی کک باکسنگ اوپن چمپئن شپ میں طلائی تمغہ حاصل کر ضلع سمیت ریاست کا نام روشن کیا ہے۔ دراصل دہلی کے تالکٹورہ اسٹیڈیم میں یہ مقابلہ منعقد کیا گیا تھا جہاں ڈویژنل ہیڈکوارٹر امبیکاپور کے رہنے والے تین کھلاڑیوں نے شاندار کھیل کا مظاہرہ کیا۔ اپنے حریف کو شکست دے کر ان تینوں نے طلائی تمغہ اپنے نام کیا ہے۔ ان کی اس کامیابی سے امبیکاپور سمیت ضلع بھر میں خوشی کا ماحول ہے۔

دراصل دہلی کے تالکٹورہ اسٹیڈیم میں 2 نومبر سے 6 نومبر تک بین الاقوامی کک باکسنگ مقابلے کا انعقاد ہوا تھا۔ اس میں ہندوستان سمیت کچھ دیگر ممالک کے کھلاڑی شامل ہوئے تھے۔ کک باکسنگ مقابلہ میں ابیکاپور شہر کے اورینٹل پبلک اسکول میں 12ویں کی طالبہ سواتی راجواڑے نے اردن کی کھلاڑی کو شکست دے کر طلائی تمغہ اپنے نام کیا۔ سرسوتی کالج امبیکا پور میں بی بی اے کے طالب علم سرور ایکا نے جنوبی کوریا اور تمل ناڈو کے کھلاڑی کو ہرایا۔ ان کے علاوہ سرسوتی کالج کے ہی طالب علم امن جینس لکڑا نے ازبکستان کے کھلاڑی کو شکست دے کر طلائی تمغہ اپنے نام کیا۔

طلائی تمغہ حاصل کرنے والی سواتی راجواڑے نے اپنی کامیابی پر خوشی کا اظہار کیا ہے۔ اس کا کہنا ہے کہ ’’دہلی کے تالکٹورا اسٹیڈیم میں ٹورنامنٹ منعقد کیا گیا تھا جس میں ہندوستانی کھلاڑیوں کی کارکردگی بہترین تھی۔ ہمارے کلب سے بھی بچے تالکٹورہ گئے ہوئے تھے۔ میں نے وہاں اچھی کارکردگی کا مظاہرہ کیا۔‘‘ وہ مزید کہتی ہے کہ ’’میرا سیمی فائنل میچ جنوبی کوریا کے ساتھ ہوا اور فائنل میچ اردن کے ساتھ۔ میں نے اپنے مقابلے جیت کر طلائی تمغہ پر قبضہ کیا۔‘‘ قابل ذکر ہے کہ سواتی کا اس سے پہلے عالمی چمپئن شپ میں دو بار سلیکشن ہو چکا ہے، لیکن معاشی حالت ٹھیک نہیں ہونے کی وجہ سے وہ کھیلنے دوسرے ملک نہیں جا سکی۔