16 سالہ تسنیم میر نے رقم کی تاریخ، دنیا کی نمبر ایک جونیئر بیڈمنٹن کھلاڑی بننے میں کامیاب

تسنیم میر گزشتہ سال کی شاندار کارکردگی کے دم پر نمبر ایک رینکنگ تک پہنچی ہیں، ایسا کارنامہ کرنے والی وہ ہندوستان کی پہلی بیڈمنٹن کھلاڑی ہیں

تسنیم میر / تصویر ٹوئٹر
تسنیم میر / تصویر ٹوئٹر
user

قومی آوازبیورو

نئی دہلی: گجرات سے تعلق رکھنے والی بیڈمنٹن کھلاڑی تسنیم میر نے تاریخ رقم کر دی ہے۔ 16 سال کی عمر میں وہ جونیئر بیڈمنٹن میں دنیا کی نمبر ایک کھلاڑی بن گئی ہیں۔ تسنیم گزشتہ سال کی بہترین کارکردگی کے دم پر اس مقام پر پہنچی ہیں۔ وہ ایسا کارنامہ کرنے والی ملک کی پہلی کھلاڑی ہیں۔ پی وی سندھو اور سائنا نہوال جیسی کھلاڑی بھی جونیئر سطح پر کبھی نمبر ایک کھلاڑی نہیں بن پائی تھیں۔

میڈیا رپورٹ کے مطابق اپنی اس کامیابی پر بات کرتے ہوئے تسنیم میر نے کہا کہ انہوں نے اس کامیابی کی امید بھی نہیں کی تھی۔ تسنیم نے کہا کہ ’’میں ایسا نہیں کہہ سکتی کہ مجھے اس کی امید تھی۔ مجھے لگا کہ میں نمبر ایک نہیں بن پاؤں گی، کیونکہ ٹورنامنٹ کورونا سے متاثر ہو رہے تھے لیکن میں نے بلغاریہ، فرانس اور بلجیم میں خطاب جیتے۔ اب میں بہت خوش ہوں کہ آخرکار میں ٹاپ نمبر کی کھلاڑی بن گئی۔ یہ میرے لئے بہترین لمحات ہیں۔‘‘


تسنیم نے کہا کہ ’’اب میں پوری توجہ سینئر سرکٹ پر مرکوز رکھوں گی اور اگلے ماہ ایران اور یوگانڈا میں کھیلنے کی منتظر ہوں۔ اب میرا ہدف اپنی سینئر رینکنگ کو بہتر بنانا ہے۔ اگر میں کچھ اچھی پرفارمنس کے ساتھ سال کے آخر تک ٹاپ 200 میں شامل ہو جاؤں تو یہ بہت اچھا ہوگا۔‘‘

تسنیم نے جو کچھ حاصل کیا، وہ سندھو اور سائنا نہوال بھی نہیں کر پائی تھیں۔ سندھو اپنے انڈر 19 دنوں کے دوران دنیا کی نمبر دو کھلاڑی تھیں۔ تلنگانہ کی سامعہ عماد فاروقی نے بھی بہترین کارکردگی کا مظاہرہ کیا تھا لیکن وہ بھی دوسرے مقام تک ہی پہنچ سکیں۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔