بلغاریہ: ٹیکسی ڈرائیور کی 17 سالہ بیٹی نے رقم کی تاریخ، چینی پہلوان کو پٹخنی دے کر لہرایا ہندوستانی پرچم

بلغاریہ میں منعقد انڈر-20 عالمی کشتی چمپئن شپ ہندوستان کی جواں سال خاتون پہلوان کاجل دوچک کے لیے یادگار ثابت ہوا ہے۔ بلغاریہ کے سموکاف میں کھیلے گئے اس ٹورنامنٹ میں ٹیکسی ڈرائیور کی 17 سالہ بیٹی کاجل نے فائنل مقابلے میں چینی پہلوان کو پٹخنی دے کر طلائی تمغہ اپنے نام کر لیا ہے۔ انھوں نے اس مقابلے میں چین کی لیو یوکی کو 6-8 سے شکست دی اور ہندوستان کا پرچم لہرا کر اپنی خوشی کا اظہار کیا۔

کاجل دوچک کی کارکردگی اس پورے ٹورنامنٹ میں لاجواب رہی۔ انھوں نے سب سے پہلے بلغاریہ کی ایملی مہائیلووا اور کرغستان کی کیئرکل شارشیبائیوا کو شکست دے کر سبھی کی توجہ اپنی طرف مبذول کی۔ بعد ازاں انھوں نے سیمی فائنل میں امریکہ کی جیسمین رابنسن کو 6-13 سے شکست فاش دے کر فائنل میں اپنی جگہ پختہ کر لی۔ سیمی فائنل کی کارکردگی نے ایک طرح سے لوگوں کو حیران کر دیا، اور سبھی کاجل کی تعریف کرتے ہوئے نظر آئے۔

فائنل مقابلے میں کاجل نے چینی پہلوان لیو یوکی کو زبردست ٹکر دی۔ ایک وقت تو ایسا تھا جب کاجل نے 0-4 کی سبقت حاصل کر لی تھی۔ اس کے بعد چینی پہلوان نے واپسی کی اور کاجل کو سخت چیلنج پیش کیا۔ لیکن کاجل نے بھی اچھا ڈیفنس دکھایا اور موقع ملتے ہی جارحانہ رخ بھی اختیار کیا۔ آخر میں انھوں نے فائنل مقابلہ 6-8 سے اپنے نام کر لیا۔

قابل ذکر ہے کہ کاجل سونی پت واقع لٹھ جولی گاؤں سے تعلق رکھتی ہے۔ اس کے والد ٹیکسی ڈرائیور ہیں۔ بھلے ہی اس کے گھر کی معاشی حالت بہت اچھی نہین تھی، لیکن والد نے ہمیشہ کشتی کے لیے حوصلہ افزائی کی۔ دراصل والد اور چچا دونوں ہی کشتی لڑ چکے ہیں اور انھوں نے کاجل کو بچپن سے ہی تربیت دینی شروع کر دی تھی۔ یہی وجہ ہے کہ کاجل اب اس کھیل کی ماہر کھلاڑی بن گئی ہے۔ اس نے 2024 میں 73 کلوگرام زمرہ میں انڈر-17 ایشیائی خطاب اور 69 کلوگرام زمرہ میں انڈر-17 عالمی خطاب جیتا۔