ایشین گیمز 2026: ہندوستان کو ملا دوسرا طلائی تمغہ، 10 میٹر ایئر پسٹل میں کمل جیت-سروچی نے توڑا ریکارڈ

2026 کے ایشین گیمز میں ہندوستان نے دوسرا طلائی تمغہ جیت لیا ہے۔ 10 میٹر ایئر پسٹل مکسڈ ایونٹ میں ہندوستانی ٹیم نے سونے کے میڈل پر نشانہ لگایا۔ ان کھیلوں میں ہندوستان کا یہ دوسرا طلائی تمغہ ہے۔ پہلا طلائی تمغہ ہندوستانی خواتین کرکٹ ٹیم نے جیتا تھا۔ اس کے ساتھ ہی ہندوستان کے تمغوں کی تعداد 19 ہو گئی ہے۔ کمل جیت سنگھ اور سروچی کی جوڑی نے مجموعی طور پر 484.6 اسکور حاصل کر ایک نیا ریکارڈ بھی قائم کیا۔

کمل جیت اور سروچی نے شروعات سے ہی اچھی برتری بنا لی تھی، لیکن جنوبی کوریا مسلسل ہندوستانی نشانہ بازوں پر دباؤ بنائے ہوئے تھا۔ تاہم ہندوستانی کھلاڑیوں نے دباؤ میں کوئی غلطی نہیں کی اور جنوبی کوریا کو 6.6 پوائنٹس کے فرق سے شکست دے کر طلائی تمغہ اپنے نام کر لیا۔ جنوبی کوریا کا مجموعی اسکور 478 رہا، جبکہ ایران تیسرے مقام پر رہا، جس کا فائنل اسکور 415.8 تھا۔

قابل ذکر بات یہ ہے کہ کمل جیت اور سروچی سنگھ نے کوالیفکیشن راؤنڈ میں بھی شاندار کارکردگی کا مظاہرہ کرتے ہوئے پہلی پوزیشن حاصل کی تھی۔ فائنل کی بات کریں تو پہلی سیریز سے ہی ہندوستانی جوڑی نے جنوبی کوریا پر مضبوط برتری قائم کر رکھی تھی۔ پہلی سیریز میں ہی ہندوستانی ٹیم نے جنوبی کوریا پر 4.9 پوائنٹس کی برتری حاصل کر لی تھی، جو نشانہ بازی میں اچھی مانی جاتی ہے۔ دوسری سیریز میں کوریائی ٹیم نے شاندار کھیل کا مظاہرہ کیا اور ہندوستان کی برتری گھٹ کر محض 1.2 پوائنٹس رہ گئی۔ کمل جیت اور سروچی پر دباؤ تھا، لیکن انہوں نے اپنا صبر نہیں کھویا اور اس کے بعد ہندوستان کی برتری بڑھتی چلی گئی۔

ایک وقت ہندوستانی ٹیم نے کوریائی کھلاڑیوں پر 7.2 پوائنٹس کی برتری حاصل کر لی تھی۔ تاہم آخری لمحات میں سروچی نے 10.5 اسکور کیا، لیکن کمل جیت صرف 9.5 اسکور ہی کر سکے۔ آخر میں ہندوستان نے 6.6 پوائنٹس کی برتری کے ساتھ طلائی تمغہ جیت لیا۔ ان دونوں کھلاڑیوں کے ذریعہ حاصل کیا گیا 484.6 اسکور ایشین گیمز میں ایک نیا ریکارڈ بھی ہے۔

قابل ذکر ہے کہ 2026 کے ایشین گیمز میں ہندوستان اب تک مجموعی طور پر 19 تمغے جیت چکا ہے۔ کمل جیت اور سروچی نے 10 میٹر ایئر پسٹل مکسڈ ایونٹ میں طلائی تمغہ جیتا ہے۔ ان کے علاوہ مردوں کے 50 میٹر رائفل تھری پوزیشنز مقابلے میں چاندی کا تمغہ بھی جیت لیا گیا ہے۔ ہندوستان کے نام اب تک 2 طلائی، 8 چاندی اور 9 کانسے کے تمغے ہیں۔