ملالہ یوسف زئی پاکستان پہنچ گئیں

پاکستانی میڈیا رپورٹوں کے مطابق نوبل امن انعام یافتہ ملالہ یوسف زئی ایک نجی ایئر لائن کی پرواز سے منگل کی صبح کو اپنے والدین کے ساتھ کراچی پہنچیں۔ اس دوران ان کی حفاظت کے لیے کراچی ایئر پورٹ پر سخت انتظامات کیے گئے تھے۔

حکومتی ذرائع کے مطابق سندھ کے محکمہ داخلہ کی جانب سے ملالہ یوسف زئی کی سکیورٹی کے سخت انتظامات کرنے کی ہدایت پہلے سے ہی جاری کردی گئی تھی اور پولیس کی خصوصی یونٹ انہیں سکیورٹی فراہم کر رہی ہے۔

ذرائع کے مطابق ملالہ یوسف زئی پاکستان میں سیلاب سے متاثرہ علاقوں کا دورہ کریں گی۔ انہیں سخت حفاظتی انتظامات میں دادو میں سیلاب سے متاثرہ علاقوں میں لے جایا جائے گا۔

وادی سوات میں سن 2012 میں اپنے اسکول سے واپس لوٹتے وقت طالبان کی گولیوں سے زخمی ہوجانے والی ملالہ یوسف زئی کا یہ پاکستان کا دوسرا دورہ ہے۔

ملالہ پر حملے کی ذمہ داری تحریک طالبان پاکستان نے قبول کی تھی۔ ملالہ کو خواتین کی تعلیم کے لیے آواز بلند کرنے پر جب طالبان نے نشانہ بنایا اس وقت ان کی عمر صرف 15 برس کی تھی۔ انہیں ابتدائی طبی امداد کے بعد علاج کے لیے برطانیہ لے جایا گیا تھا۔

خواتین کی تعلیم کے لیے ان کی کوششوں کے اعتراف میں انہیں امن کا نوبل انعام دیا گیا تھا۔ 17 برس میں نوبل انعام حاصل کرنے والی وہ سب سے کم عمرترین شخصیت ہیں۔ ملالہ برطانیہ جانے کے بعد سن 2018 میں پہلی مرتبہ پاکستان آئی تھیں۔

خیال رہے کہ گزشتہ ماہ اقوام متحدہ کی جنرل اسمبلی کے اجلاس کے دوران ملالہ یوسف زئی نے پاکستان کے وزیر اعظم شہباز شریف سے ملاقات کی تھی۔

ملالہ نے اس موقع پر پاکستان میں آنے والی حالیہ سیلاب کی تباہ کاریوں پر افسوس کا اظہار کیا تھا۔ انہوں نے بالخصوص اسکولوں اور تعلیمی انفراسٹرکچر کو پہنچنے والے نقصان پر افسوس ظاہر کرتے ہوئے ہر ممکن تعاون کی یقین دہانی کرائی تھی۔ پاکستانی وزیر اعظم نے ملالہ یوسف زئی کی جانب سے سماجی مسائل اور بالخصوص بچیوں کی تعلیم کی ان کی کوششوں کی تعریف کی تھی۔