گھر کی کھڑکی کے نیچے شور مچانے پر پانچ نوجوان قتل

روسی دارالحکومت سے موصولہ رپورٹوں کے مطابق یہ خونریز واقعہ ماسکو سے تقریباﹰ 300 کلومیٹر جنوب مشرق کی طرف واقع ایک چھوٹے سے شہر ژیلاتما میں ہفتہ چار اپریل کو رات گئے پیش آیا۔ ایک رہائشی عمارت کے مرکزی دروازے کے سامنے کھڑے پانچ نوجوان آپس میں بہت بلند آواز میں گفتگو کر رہے تھے۔

یہ بات عمارت کے ایک ایسے رہائشی کو بہت ناگوار گزری، جس کے فلیٹ کی کھڑکی کے عین نیچے یہ پانچوں نوجوان آپس میں کسی بحث میں مصروف تھے۔

اس مکین نے، جس کی عمر بتیس سال بتائی گئی ہے، اپنے فلیٹ کی بالکونی پر جا کر ان نوجوانوں کو اپنی آواز نیچی رکھنے کے لیے کہا تو اطراف کے مابین زبانی جھگڑا شروع ہو گیا۔

روس میں جرائم کی تفتیش کرنے والی مرکزی تحقیقاتی کمیٹی نے آج اتوار کے روز بتایا کہ جب یہ جھگڑا زیادہ ہو گیا، تو شور کی شکایت کرنے والا شخص مشتعل ہو کر شکار کے لیے استعمال کی جانے والی اپنی بندوق لے کر نیچے عمارت کے مرکزی دروازے تک گیا اور اس نے فائرنگ کر کے ان نوجوانوں کو قتل کر دیا۔

تفتیشی حکام کے مطابق پانچوں نوجوان موقع پر ہی دم توڑ گئے تھے۔ ان میں سے ایک نوجوان عورت تھی اور باقی چاروں مرد۔

اس واقعے کے بعد مبینہ قاتل کو اس کے گھر کے قریب سے ہی گرفتار کر لیا گیا۔ کچھ دیر بعد پولیس نے اس کے گھر سے اس جرم میں استعمال ہونے والی بندوق بھی برآمد کر لی۔ وسطی روس کے جس علاقے میں اس جرم کا ارتکاب کیا گیا، وہاں بھی کورونا وائرس کی وبا کے باعث عام لوگوں کے اپنے گھروں سے نکلنے پر ملک کے دیگر حصوں کی طرح جزوی پابندی عائد ہے۔