اربوں یورو ساتھ لے جانے والوں کا ڈھائی سو یورو کا مطالبہ

جرمن دارالحکومت برلن سے منگل یکم جنوری کو ملنے والی نیوز ایجنسی روئٹرز کی رپورٹوں کے مطابق یورپی یونین کی سب سے بڑی معیشت جرمنی میں اس شعبے کے ملازمین کی مجموعی تعداد قریب ساڑھے بارہ ہزار ہے۔

یہ کارکن، جو آتشیں ہتھیاروں سے مسلح ہوتے ہیں، اکثر مال بردار بکتر بند گاڑیوں کے ذریعے مختلف بینکوں اور بڑے بڑے سٹوروں کو کیش ڈلیوری کا کام کتتے ہیں۔

ملک کی سب سے بڑی ٹریڈ یونین ’وَیردی‘ (Ver.di) کی طرف سے اس ہڑتال کا اعلان ان ہزاروں ملازمین کی ماہانہ تنخواہوں میں اضافے کے لیے ان کے آجرین کے ساتھ جاری بات چیت کے پانچ مختلف دور ناکام رہنے کے بعد یکم جنوری کو کیا گیا۔

کیش ٹرانسپورٹ کے شعبے کے آجر اداروں کے ساتھ ان ملازمین کے لیے ’وَیردی‘ کی طرف سے مذاکرات کرنے والے اعلیٰ ترین مندوب آرنو پوئکَس نے روئٹرز کو بتایا، ’’یہ ملک گیر ہڑتال بدھ دو جنوری سے شروع ہو گی، جو ممکنہ طور پر جمعہ چار جنوری تک جاری رہے گی۔

اس ہڑتال کے خاتمے کے وقت کا انحصار اس بات پر ہو گا کہ آجرین کے ساتھ بات چیت کے اسی ہفتے جمعرات اور جمعے کے لیے طے کردہ اگلے دو ادوار کے کیا نتائج نکلتے ہیں۔‘‘

آرنو پوئکَس نے کہا، ’’ہماری طرف سے آجرین کے لیے پیغام بہت واضح ہے۔ اگر انہوں نے ماہانہ تنخواہوں میں اضافے کے لیے کوئی ایسی پیشکش نہ کی، جس پر کم از کم بات شروع کی جا سکے، تو اس ہڑتال کی مدت میں توسیع کر دی جائے گی۔‘‘

یہ صورت حال عام صارفین کے لیے اس وجہ سے بھی پریشانی کا باعث ہو گی کہ سال نو کے موقع پر چھٹی کے بعد اکثر بینکوں کی کیش مشینیں خالی ہوتی ہیں، جنہیں دوبارہ بھرنا ضروری ہو چکا ہوتا ہے۔

وَیردی کا مطالبہ ہے کہ ملک میں کیش ٹرانسپورٹ کے شعبے کے کارکنوں کی ماہانہ تنخواہوں میں ڈھائی سو یورو کا اضافہ کیا جائے۔ اس کے علاوہ اگلے دو سال کے دوران ملک کے نئے مشرقی صوبوں اور پرانے مغربی صوبوں میں اسی شعبے کے ملازمین کی تنخواہوں میں پائے جانے والے فرق کو بھی ختم کیا جائے۔

اس وقت جرمنی کے نئے مشرقی صوبوں میں اس شعبے کے ’مَنی کاؤنٹر‘ اور ’کیش ڈرائیور‘ کہلانے والے ملازمین کی ماہانہ تنخواہیں 18 سو یورو سے لے کر 24 یورو تک بنتی ہیں۔ اس کے برعکس پرانے مغربی صوبوں میں یہی اوسط ماہانہ تنخواہیں 22 سو یورو سے لے کر 29 سو یورو تک ہوتی ہیں۔