سو سال پرانے گھر سے چھ ہزار شہد کی مکھیاں نکال لی گئیں

تھاماس اور میریلو نے اوماہا ورلڈ ہیرلڈ نامی اخبار کو ایک انٹرویو میں بتایا کہ وہ اپنے گھر کے باہر ایسے پھول کافی عرصے سے اگا رہے تھے جن کا رس شہد کی مکھیاں پسند کرتی ہیں لیکن انہیں یہ توقع بالکل نہ تھی کہ مکھیاں ان کے گھر کو اپنا گھر بنا لیں گی۔

اس جوڑے کی رائے میں عین ممکن ہے کہ یہ مکھیاں اینٹوں کو جوڑنے کے لیے استعمال ہونے والے سیمنٹ میں کسی سوراخ سے دیوار کے اندر داخل ہو گئی تھیں۔ ان کے مطابق انہیں شہد کی مکھیوں کی موجودگی کا اس وقت پتا چلا جب انہوں نے دیکھا کہ کچن کی کھڑکی کے باہر کچھ شہد کی مکھیاں بھنبھنا رہی تھیں اور پھر انہیں گھر کی دوسری منزل پر 30 سے زیادہ مکھیاں نظر آئیں۔

تھامس کے مطابق پہلے انہوں نے سوچا کہ ان مکھیوں کا خاتمہ زہر سے کیا جائے لیکن پھر انہیں یاد آیا کہ انہوں نے ماحول کے لیے شہد کی مکھیوں کی اہمیت سے متعلق بہت ٹی وی پروگرامز دیکھے ہیں۔ تب انہوں نے اوماہا بی کلب سے رابطہ کیا۔ اس کلب نے چھ سو ڈالر کے عوض ان شہد کی مکھیوں کو محفوظ مقام پر منتقل کر دیا۔

ان کے گھر کی دیوار میں پہلے ایک سوراخ کیا گیا اور ویکیوم کے ذریعے شہد کی مکھیوں کو جمع کیا گیا۔ دیوار کے اندر مکھیوں کی جانب سے بنایا گیا شہد بھی موجود تھا۔ اس جوڑے کا کہنا ہے کہ ان مکھیوں کی جانب سے بنایا گیا شہد انہوں نے بھی چکھا۔