ایک ہی بستر میں لیٹے ہوئے میاں بیوی الگ الگ ملکوں میں

سرخ اینٹوں والے مکانات، بڑے دروازوں والے گودام، صاف ستھری گلیاں، پہلی نظر میں یہ قصبہ یورپی ممالک بیلجیم اور نیدرلینڈز کے عام سرحدی قصبوں جیسا ہی نظر آتا ہے۔ لیکن حقیقت میں بارلے کی حیثیت انتہائی منفرد ہے۔ یہاں آپ ناشتہ ایک ملک میں تیار کر سکتے ہیں اور اسے کھا دوسرے ملک میں سکتے ہیں۔ یا پھر آپ ایک ملک میں کرسی رکھ کر بیٹھیں اور دوسرے ملک کی سرحد کے اندر رکھا ٹیلی وژن دیکھ سکتے ہیں۔ بارلے میں یہ بھی ممکن ہے کہ میاں بیوی ایک ہی بیڈ پر سوئیں لیکن ایک ہی وقت میں دونوں الگ الگ ملکوں میں لیٹے ہوں۔

اصل میں بارلے کے قصبے کے کچھ حصے بیلجیم اور کچھ نیدرلینڈز کی سرحد کے اندر آتے ہیں۔ دونوں ملکوں کے مابین سرحد لوگوں کے گھروں سے ہوتی ہوئی گزرتی ہے۔ سرحد کے نشانات سفید کراس سے لگائے گئے ہیں اور یہی نشانات بارلے کی پہچان بھی ہیں۔

اس عجیب و غریب سرحد کا تعلق قرون وسطیٰ کے امیر خاندانوں کے درمیان جائیداد کی تقسیم سے بھی ہے۔ مقامی سیاحتی آفس کے سربراہ ولیم فان گول کا ڈی ڈبلیو سے گفتگو کرتے ہوئے کہنا تھا، ''مثال کے طور پر 1198ء میں پہلے ڈیوک ہینری آف بریبنٹ نے یہ علاقہ لارڈ آف بریڈا کو پٹے پر دے دیا۔ بعدازاں لارڈ آف بریڈا کو وہ زمین اپنے پاس رکھنے کی اجازت دے دی گئی، جو زراعت کے لیے استعمال نہیں ہوتی تھی۔ ڈیوک نے اپنے لیے ذرخیز زمین رکھی۔‘‘

سن 1830ء میں ہالینڈ سے آزادی کے بعد بیلجیم کے لیے سرحدوں کا تعین ضروری تھا۔ اس وقت جنگ میں بچ جانے والوں نے بحیرہ شمالی سے جرمن ریاستوں تک تو سرحد کا تعین کر لیا لیکن جب وہ اس علاقے تک پہنچے تو یہاں سرحد کے مسائل بعد میں حل کرنے کے لیے چھوڑ دیے گئے۔

لیکن ایسا 165 برس بعد بھی نہ ہوا۔ پھر سن 1995ء میں یہاں دو میونسپیلیٹیز بنا دی گئیں۔ بیلجیم میں اس کا نام بارلے ہیرٹوگ جبکہ ہالینڈ میں بارلے ناساؤ رکھا گیا۔ اس میں مجموعی طور پر 60 انکلیوز بھی شامل کیے گئے اور اس حوالے سے یہ دنیا کا منفرد علاقہ ہے۔

تاہم سرحد کے تعین نے بارلے کے رہائشیوں کے لیے صورتحال کو آسان نا بنایا۔ کئی گھر، باغ، گلیاں، دکانیں وغیرہ دونوں ممالک میں تقسیم ہو چکے تھے۔ مستقل تنازعے سے بچنے کے لیے یہ فیصلہ کیا گیا کہ جس گھر کا داخلی دروازہ، جس ملک کی سرحد کے اندر ہو گا، اس کے مکینوں کو اسی ملک کی شہریت دی جائے گی۔

لیکن اس سے بارلے کے لوگوں کی الجھنیں مزید بڑھ گئیں۔ سن 1995 میں ڈچ حکام نے ایک خاتون کے دروازے پر دستک دی، جو 68 برسوں سے بیلجیم کی شہری تھی، ''آپ کا داخلی دروازہ ہالینڈ میں ہے اور اب آپ ہالینڈ کی شہری ہیں۔ پلیز، اب آپ ایک نیا پاسپورٹ بنوائیں۔‘‘

لیکن اس خاتون کے احتجاج کے بعد ایک نیا حل نکالا گیا۔ خاتون کے گھر کی ایک کھڑکی کو توڑ کر اس کا نیا دروازہ بنایا گیا، جو بیلجیم میں تھا اور اس طرح اسے اپنا پرانا پاسپورٹ رکھنے کی اجازت مل گئی۔

بارلے میں ہر چیز دو مرتبہ ہے۔ ایک ہی علاقے کے دو نام، دو میئر، دو ملکوں کی انتظامیہ، دو پوسٹ آفس لیکن ان سب کو چلانے والی کمیٹی ایک ہی ہے تاکہ مقامی مسائل کا فوری حل نکالا جائے اور تعاون کو مزید بہتر بنایا جائے۔ مثال کے طور پر دونوں سرحدوں میں آنے والے علاقوں کی صفائی، منقسم گھروں کے کوڑے کو ٹھکانے لگانے کی ذمہ داری اور ایسے ہی دیگر چھوٹے چھوٹے مسائل حل کرنا اسی کمیٹی کی ذمہ داری ہے۔

بیلجیم میں واقع بارلے کے مئیر فرانز ڈے بونٹ کا کہنا تھا، ''ہم بات چیت کرتے ہیں، اس میں صبر کی ضرورت ہوتی ہے، ہم غور سے پہلے سب کی بات سنتے ہیں اور پھر کوئی حل تجویز کرتے ہیں۔ آپ دوستانہ رویہ اختیار کرتے ہوئے اور بات چیت کے ذریعے ہر مسئلے کا حل تلاش کر لیتے ہیں۔‘‘

آج کل کورونا وائرس کی وجہ سے بیلجیم اور نیدرلینڈز کے حفاظتی قوانین ایک دوسرے سے مختلف ہیں اور اس علاقے کے رہائشیوں کو ایک مرتبہ پھر نئے مسائل کا سامنا ہے۔