نئے آئی فون کے ساتھ چارجر اور ایئرفون نہ دینے کا فیصلہ، ایپل کی 498 ارب روپے کی بچت

یہ رپورٹ میں انکشاف ہوا ہے کہ ایپل نے نئے آئی فون کے باکس سے چارجر اور ایئر پوڈز نکال کر 5 ارب پاؤنٹ کی بچت کی ہے۔

تصویر بشکریہ / www.macrumors.com
تصویر بشکریہ / www.macrumors.com
user

قومی آوازبیورو

نئی دہلی: امریکہ کی مشہور کمپنی ایپل نے سال 2020 میں اپنے نئے فون کے ساتھ چارجر اور ایئرپوڈ (ایئرفون) دینے کا سلسلہ بند کر دیا۔ کمپنی کے اس فیصلے سے صارفین ضرور ناراض ہوئے لیکن کمپنی کو اس سے بھاری منافع ہوا۔ ایک تازہ رپورٹ میں اس حقیقت کا انکشاف ہوا ہے۔

کمپنی نے آئی فون 12 کے ساتھ چارجر اور ایئرپوڈ نہیں دینے کے اقدام کے پیچھے کئی وجوہات بیان کیں اور ماحولیاتی تحفظ کا بھی حوالہ دیا۔ تاہم لوگوں کا خیال تھا کہ کمپنی نے یہ قدم اپنے منافع میں اضافے کے لیے لیا ہے۔ اس اقدام سے کمپنی کو ہونے والے فائدہ کا انکشاف ہونے کے بعد منافع کے لئے اس فیصلے کو لینے کے نظریہ کو تقویت حاصل ہوئی ہے۔


رپورٹ کے مطابق باکس سے چارجر اور ایئر پوڈ نکالے جانے کی وجہ سے آئی فون کی پیکیجنگ چھوٹی ہو گئی۔ کمپنی نے آئی فون کے ریٹیل بکس کو پہلے سے چھوٹا کر دیا ہے جس کی وجہ سے کمپنی کو کافی منافع ہوا ہے۔ دراصل، باکس کے چھوٹے سائز کی وجہ سے، 70 فیصد مزید آلات شپمنٹ میں فٹ ہونے کے قابل ہو گئے۔ زیادہ باکس ہونے کا مطلب ہے کہ ایپل ایک وقت میں زیادہ آئی فون بھیجنے میں کامیاب ہو سکے گی۔

کمپنی نے دعویٰ کیا تھا کہ اس سے کاربن کے اخراج میں 20 لاکھ میٹرک ٹن تک کی کمی لائی جاسکتی ہے جو کہ تقریباً 5 لاکھ کاروں کو سڑک سے ہٹانے کے برابر ہوگی۔ تاہم ڈیلی میل کی رپورٹ کے مطابق کمپنی نے چارجر اور ایئر پوڈز کو ہٹا کر 5 ارب پاؤنڈ بچا لئے ہیں، یہ تقریباً 498 ارب روپے ہوتے ہیں۔ رپورٹ کے مطابق کمپنی نے نئے آئی فونز کے ساتھ باکس میں ملنے والی ایکسسریز کو ہٹا کر آئی فون کے لئے 5-جی موڈیم میں ہونے والے خرچ کو دوگنا کر دیا ہے۔


خیال رہے کہ ریٹیل باکس کے سائز میں کمی کی وجہ سے کمپنی نے شپنگ لاگت میں بھی تقریباً 40 فیصد کی بچت کی ہے۔ اس کے علاوہ کمپنی صارفین کو الگ سے چارجرز اور ایئر پوڈ فروخت کر کے بھی پیسے کما رہی ہے۔ یعنی کمپنی نے صرف دو سالوں میں اپنے اس اقدام کی بدولت کئی سو ارب روپے بچائے ہیں۔ خیال رہے کہ باکس سے چارجر اور ایئرفون ہٹانے کی فہرست میں سامسنگ اور شیومی بھی شامل ہیں۔ تاہم، شیومی اپنے صارفین کو چارجر کے ساتھ اور اس کے بغیر اسمارٹ فون خریدنے کا اختیار دیتا ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔