عید الفطر کی تصویری جھلکیاں: کہیں عیدگاہ میں نمازیوں کی زبردست بھیڑ، تو کہیں پسرا رہا سناٹا

آج پورے ملک میں عید الفطر کا تہوار انتہائی جوش و جذبہ کے ساتھ منایا جا رہا ہے۔ مسلم طبقہ نے عیدگاہوں اور مساجد میں عید کی نماز ادا کی اور لوگوں کو گلے مل کر مبارکباد پیش کی۔ کئی لوگ دوست و احباب کے گھر جا رہے ہیں اور گلے مل کر ایک دوسرے کو عید کی مبارکباد پیش کر رہے ہیں۔ اس موقع پر کئی سرکردہ سیاسی لیڈروں نے بھی اہم عیدگاہوں و مساجد میں پہنچ کر مسلمانوں کو عید کی مبارکباد پیش کی۔ ان لیڈروں میں بہار کے وزیر اعلیٰ نتیش کمار، مغربی بنگال کی وزیر اعلیٰ ممتا بنرجی، اتر پردیش کے سابق وزیر اعلیٰ اکھلیش یادو وغیرہ شامل ہیں۔ عید کی نماز کے لیے مساجد اور عیدگاہوں میں لوگوں کی زبردست بھیڑ دیکھنے کو ملی، لیکن کچھ ایسے مقامات بھی رہے جہاں عید کے دن بھی سناٹا پسرا رہا۔ مثلاً سری نگر کی مشہور جامعہ مسجد میں سیکورٹی خدشات کے پیش نظر عید کی نماز نہیں ہوئی۔ اسی طرح اڈیشہ کے سنبل پور عیدگاہ میں بھی نمازِ عید ادا نہیں کی گئی۔