بے روزگاری اور قرض سے پریشان پاکستانی صحافی نے خود کشی کر لی

اسلام آباد: پاکستان کے کراچی میں چند ماہ قبل برطرف کیے گئے ایک صحافی نے بے روزگاری، بڑھتی مہنگائی اور 60,000 روپے کے قرض سے تنگ آکر خودکشی کرلی۔ جیو ٹی وی کی رپورٹ کے مطابق صحافی فہیم مغل جمعہ کی صبح اپنے گھر کی چھت سے لٹکے پائے گئے۔ ان کے پسماندگان میں اہلیہ، پانچ بیٹیاں اور ایک بیٹا شامل ہے۔

فہیم نے 2 جون کو اپنے فیس بک اکاؤنٹ پر ایک اسٹیٹس پوسٹ کیا تھا جس میں لکھا تھا کہ ”میری نوکری چلی گئی ہے اس لیے میں بہت پریشان ہوں۔ میرے لئے دعا کرنا۔“ دی نیوز انٹرنیشنل کی ایک رپورٹ کے مطابق فہیم جون میں کراچی کے ایک میڈیا گروپ کی جانب سے برطرف کیے جانے کے بعد اپنے خاندان کی کفالت کے لیے رکشہ چلا رہے تھے۔ ان کی سب سے بڑی بیٹی نے کہا کہ اکثر ہم ہفتوں تک بغیر کھائے پیئے رہتے تھے۔ وہ پاس کے جے ڈی ایس (ایک خیراتی تنظیم) سے کھانا لے کر آتے تھے۔

پاکستانی روزنامے نے رپورٹ کیا کہ فہیم کے دوست عمیر دبیر نے انکشاف کیا کہ خودکشی سے چند گھنٹے قبل فہیم کے پاس اپنے بچے کے لیے دودھ خریدنے کے پیسے نہیں تھے۔ فہیم کے دوست نے بتایا کہ اس نے اپنے بچوں کے اسکولوں میں داخلے کے لیے بینک سے 60 ہزار روپے کا قرض لیا تھا اور کچھ دیر پہلے کہا تھا کہ اب مجھے نہیں لگتا کہ میں قرض واپس کر پاؤں گا۔ بینک ملازمین مجھے دھمکیاں دے رہے ہیں۔

یہ واقعہ بتاتا ہے کہ مہنگائی کی وجہ سے کم اور متوسط آمدنی والے طبقے کے لوگ اشیائے ضروریہ خریدنے کے لیے بھی کتنی جدوجہد کر رہے ہیں۔ پاکستان میں اکتوبر کے آخر میں مہنگائی کا 70 سال کا ریکارڈ ٹوٹ گیا، کیونکہ اشیائے خوردونوش کی قیمتیں مسلسل دوگنی ہو گئیں اور گھی، تیل، چینی، آٹا اور پولٹری کی قیمتیں تاریخی بلندیوں تک پہنچ گئیں۔

دی نیوز انٹرنیشنل نے وفاقی ادارہ شماریات کے حوالے سے بتایا کہ اکتوبر 2018 سے اکتوبر 2021 کے درمیان بجلی کے نرخ 57 فیصد بڑھ کر 4.06 روپے فی یونٹ سے کم ازکم 6.38 روپے فی یونٹ ہو گئے۔ قیمتوں میں سب سے زیادہ اضافہ اشیائے خوردونوش بالخصوص گھی اور تیل کی قیمتوں میں ہوا ہے۔ گھی کی قیمت 108 فیصد اضافے سے 356 روپے فی کلو ہوگئی ہے۔ دریں اثنا، تین سالوں میں چینی کی قیمت میں 83 فیصد کا اضافہ ہوا ہے۔