پاکستان: جمعہ کی صبح سبزی منڈی میں اندوہناک بم دھماکہ، 16 ہلاک، درجنوں زخمی

کوئٹہ: پاکستان میں کوئٹہ شہر کے ہزار گانجی علاقے میں جمعہ کی صبح ہونے والے بم دھماکے میں کم از کم 16 لوگوں کی موت ہو گئی اور کئی دیگر زخمی ہو گئے۔ زخمیوں کو بولان میڈیکل كمپلیكس اور سول اسپتال میں داخل کرایا گیا ہے۔ سیکورٹی فورس نے دھماکے کی جگہ کا محاصرہ کر لیا ہے اور راحت رسانی کا کام بھی تیزی کے ساتھ جاری ہے۔ بتایا جاتا ہے کہ درجنوں افراد اس دھماکہ میں زخمی ہوئے ہیں جن میں کئی کی حالت سنگین بنی ہوئی ہے۔

اس دھماکہ کے تعلق سے پولس ڈپٹی ڈائریکٹر جنرل (ڈی آئی جی) عبد الرزاق چیمہ نے اپنے بیان میں کہا ہے کہ ’’یہ دھماکہ ہزارہ کمیونٹی کے ارکان کو نشانہ بنا کر کیا گیا۔ متاثرین میں زیادہ تر سبزی بیچنے والے ہیں۔‘‘ انھوں نے دھماکے میں 16 افراد کے مارے جانے کی تصدیق بھی کی۔ ڈی آئی جی چیمہ کے مطابق دھماکے میں ہلاک لوگوں میں زیادہ تر ہزارہ کمیونٹی کے افراد ہیں۔ بم دھماکے میں فرنٹیئر کور کے ایک جوان کی بھی موت ہو گئی۔

اس درمیان پولس نے ہلاک ہونے والوں کی تعداد میں اضافہ کا خدشہ ظاہر کیا ہے۔ دھماکہ کے مقام پر ریسکیو ٹیم، پولس اور فرنٹیئر کور کے جوان پہنچ گئے ہیں۔ علاقے کو چاروں طرف سے گھیر لیا گیا ہے اور جائے حادثہ پر باہر سے آنے والے لوگوں پر روک لگا دی ہے۔

قابل ذکر ہے کہ ہزارہ برادری کو اکثر فرقہ وارانہ تشدد کا نشانہ بنایا جاتا ہے۔ چونکہ اس برادری کو ان کے جسمانی قد و قامت کی وجہ سے آسانی سے پہچانا جاسکتا ہے، اس لیے انھیں نشانہ بنانے میں شورش پسندوں کو آسانی ہوتی ہے۔