یونس نے ہندوؤں پر حملوں کے دعووں کو پروپیگنڈا قرار دیا، شیخ حسینہ پر سخت الزامات

بنگلہ دیش کی عبوری حکومت کے چیف ایڈوائزر محمد یونس نے سابق وزیراعظم شیخ حسینہ پر بڑا الزام لگا یا ہے۔ انہوں نے کہا کہ شیخ حسینہ نے سب کچھ برباد کر دیا ہے۔ یونس نے یہ بھی کہا کہ بنگلہ دیش میں انتخابی اصلاحات کے بعد ہی انتخابات ہوں گے۔محمد یونس نے انٹرویو میں یہ بات کہی  کہ انتخابات سے قبل ہمیں معیشت، گورننس، بیوروکریسی اور عدلیہ میں اصلاحات کی ضرورت ہے۔

یونس نے ایک بار پھر اس بات کا اعادہ کیا کہ انٹرنیشنل کرائم ٹربیونل میں ٹرائل ختم ہونے کے بعد ہندوستان کو شیخ حسینہ کو حوالے کرنا چاہیے۔ انہوں نے کہا کہ ٹرائل ختم ہونے اور فیصلہ آنے کے بعد وہ شیخ حسینہ کی ہندوستان سے حوالگی کی درخواست کریں گے۔ انہوں نے کہا کہ بین الاقوامی قانون کے تحت ہندوستان ان کی حوالگی کا پابند ہے۔

انہوں نے بنگلہ دیش میں ہندوؤں پر حملوں کو پروپیگنڈا قرار دیا اور اسی کا رونا رویا۔ انہوں نے کہا کہ ہندوستانی حکومت ہندوؤں کے تحفظ کے حوالے سے جس تشویش کا اظہار کر رہی ہے وہ حقائق پر مبنی نہیں ہے۔ جو کچھ کہا جا رہا ہے وہ صرف 'پروپیگنڈا' ہے۔

شیخ حسینہ کی حکومت اس سال 5 اگست کو ختم کر دی گئی تھی۔ وہ وزارت عظمیٰ کے عہدے سے استعفیٰ دے کر ہندوستان آگئی  تھیں۔ حسینہ کی حکومت کے جانے کے بعد سے ہندوستان اور بنگلہ دیش کے تعلقات خراب ہو گئے ہیں۔ بنگلہ دیش میں ہندوؤں پر حملوں میں اضافہ ہوا ہے۔ حال ہی میں ہندو مذہبی گرو چنمے کرشنا داس کی گرفتاری کے بعد تعلقات مزید بگڑ گئے۔ چنمے داس کو غداری کے الزام میں گرفتار کیا گیا تھا۔ چٹاگانگ کی عدالت نے ان کی درخواست ضمانت پر سماعت 2 جنوری تک ملتوی کر دی کیونکہ ان کی طرف سے کوئی وکیل پیش نہیں ہوا۔ ان کے حامیوں کا دعویٰ ہے کہ ان کے وکیل کی جان کو خطرہ ہے۔

یونس نے انٹرویو میں کہا کہ بنگلہ دیش کی عبوری حکومت نے انتخابی نظام، آئین اور عدلیہ میں اصلاحات کے لیے کئی کمیشن بنائے ہیں۔ انہوں نے کہا کہ ان اصلاحات پر عمل درآمد میں وقت لگے گا کیونکہ ہم بنگلہ دیش کو نئے سرے سے تعمیر کر رہے ہیں۔ یونس نے الیکشن لڑنے کی بات کو مسترد کر دیا۔

انہوں نے کہا کہ شیخ حسینہ کے 15 سال کے دور میں بنگلہ دیش میں سب کچھ برباد ہو گیا۔ ان کی حکومت میں انتظامی ڈھانچہ مکمل طور پر تباہ ہو چکا ہے۔ یونس نے الزام لگایا کہ شیخ حسینہ نے جعلی انتخابات کرائے اور خود کو اور ان کی پارٹی کو بلامقابلہ فاتح قرار دیا۔ اس نے ایک فاشسٹ حکمران کے طور پر حکومت کی۔(انپٹ بشکریہ نیو ز پورٹل ’آج تک‘)