برطانیہ میں سردی کی خوفناک لہر! سڑکوں پر برف، ٹرینیں منسوخ، 200 سے زائد اسکول بند

برطانیہ میں موسم کی صورتحال ایک بار پھر خراب ہونے کا امکان ہے کیونکہ محکمہ موسمیات نے ملک کے کئی حصوں میں شدید برف باری اور برفانی سطح کی وارننگ جاری کر دی ہے۔ محکمہ موسمیات نے شمالی انگلینڈ، شمالی آئرلینڈ اور شمالی اسکاٹ لینڈ میں یلو وارننگ جاری کی ہے۔ ایک اندازے کے مطابق کچھ علاقوں میں برف کی موٹائی 20 سینٹی میٹر تک پہنچ سکتی ہے۔ اس وارننگ کے بعد سے لوگوں کو گھروں میں رہنے کا مشورہ دیا جا رہا ہے۔

گاڑیوں کو نقل و حرکت میں کافی مشکلات کا سامنا ہے، جبکہ کئی ریلوے سروسز بھی منسوخ کر دی گئی ہیں۔ نیشنل ہائی وے نے شمال مشرق اور شمال مغرب کے کچھ علاقوں میں 10 سے 15 سینٹی میٹر برف پڑنے کی وارننگ دی ہے۔ برفباری کے باعث کئی شاہراہیں بند ہو گئی ہیں جس سے ٹریفک میں مشکلات کا سامنا ہے۔

اس خراب موسمی صورتحال کے باعث ملک بھر میں 200 سے زائدا سکول بند کر دیے گئے ہیں۔ ویلز میں 141، ویسٹ مڈلینڈز میں 50، اسکاٹ لینڈ میں 11 اور ڈربی شائر میں 19 اسکول بند کیے گئے ہیں، جس کی وجہ سے بچوں کی تعلیم بھی متاثر ہوئی ہے۔ جنوبی ویلز میں بھی برف باری اور برفیلی سطح کی وارننگ جاری کر دی گئی ہے۔

اس بار اسکاٹ لینڈ میں سردی نے 1998 کے بعد سب سے زیادہ سردی کا ریکارڈ قائم کیا ہے۔ برفباری اور سردی نے ملک کے کئی علاقوں کو راتوں رات سفید چادر میں تبدیل کر دیا ہے جس کے باعث لوگوں کو شدید سردی کا سامنا ہے۔