وینزویلا: سیاسی بحران کے باوجود ’کراکس اسٹاک ایکسچینج‘ میں ریکارڈ تیزی، ایک ہی دن میں 50 فیصد اضافہ

وینزویلا بحران اس وقت دنیا میں سب سے زیادہ زیر بحث موضوع ہے۔ ایسا ہو بھی کیوں نہ آخر ملک کے صدر کو ہی امریکہ نے گرفتار کر لیا ہے۔ یہی نہیں یہاں موجود تیل کے خزانے پر بھی امریکہ کا کنٹرول نظر آ رہا ہے۔ لیکن ایک طرف جہاں وینزویلا کے صدر نکولس مادورو کی گرفتاری نے دنیا میں ہلچل مچا دی ہے، تو دوسری جانب وینزویلا کا شیئر بازار راکٹ کی رفتار سے بھاگ رہا ہے۔ صرف ایک روز میں کراکس اسٹاک ایکسچینج میں 50 فیصد تیزی دیکھنے کو ملی ہے۔

امریکی صدر ڈونالڈ ٹرمپ نے وینزویلا کے تیل کے شعبے پر کنٹرول کا دعویٰ کرتے ہوئے امریکی تیل کمپنی کے داخلے کی بات کہہ کر عالمی توانائی کے شعبے میں ہلچل مچا دی ہے۔ اب ٹرمپ نے سوشل میڈیا پلیٹ فارم ’ٹروتھ سوشل‘ پر ایک پوسٹ کر کہا کہ ’’وینزویلا کی عبوری حکومت 30 سے 50 ملین بیرل امریکہ بھیجے گی اور اس سے حاصل ہونے والی آمدنی کو وہ ذاتی طور پر کنٹرول کریں گے۔‘‘

ہندی نیوز پورٹل ’آج تک‘ پر شائع خبر کے مطابق وینزویلا شیئر مارکیٹ کا اہم انڈیکس ’کراکس جنرل انڈیکس‘ ایک ہی روز میں 50 فیصد تک بڑھ گیا ہے۔ ایکسچینچ کے اعداد و شمار پر نظر ڈالیں تو یہ انڈیکس گزشتہ کاروباری دن 6 جنوری کو 1299 پوائنٹس یا 50.01 فیصد اضافے سے 3896.8 پر کلوز ہوا۔

واضح رہے کہ نکولس مادورو کی گرفتاری کے بعد سے ہی کراکس انڈیکس کی رفتار راکٹ کی طرح نظر آ رہی ہے اور یہ 2 جنوری کو 2231 سے بڑھ کر 6 جنوری کو 3896 سے تجاوز کر چکا ہے، جو کہ 74 فیصد سے زائد کے اضافے کو ظاہر کرتا ہے۔ یہی نہیں، اگر گزشتہ سال 23 دسمبر سے اب تک وینزویلا اسٹاک مارکیٹ کی کارکردگی کو دیکھیں تو جب سے امریکی صدر ڈونلڈ ٹرمپ نے وینزویلا پر دباؤ بڑھانا شروع کیا تھا تب سے اب تک یہ انڈیکس تقریباً 150 فیصد تک بڑھ چکا ہے۔ قابلِ ذکر ہے کہ وینزویلا کی اسٹاک مارکیٹ سنہ 1947 میں قائم کی گئی تھی اور یہ جنوبی امریکہ کی سب سے چھوٹی اسٹاک ایکسچینج ہے۔

سب سے بڑا سوال یہ ہے کہ ان تمام واقعات کے باوجود آخر وینزویلا کا شیئر بازار ٹوٹنے کے بجائے تیزی سے کیوں بھاگ رہا ہے؟ رپورٹس کے مطابق بازار کے سرمایہ کاروں میں امریکہ کی انٹری کے بعد اب سیاسی استحکام اور ملک میں معاشی اصلاحات کی امید جاگی ہے۔ اس کے علاوہ، طویل عرصے سے امریکی پابندیوں کا سامنا کرنے والے وینزویلا کو ان پابندیوں سے راحت مل سکتی ہے، جس سے عالمی سرمایہ کاری آنے سے لے کر ملک کی معاشی ترقی میں بہتری کی امید ہے، اور سرمایہ کاروں کے اس مثبت رجحان نے بازار کو مضبوطی دی ہے۔