روس کے خلاف سخت کارروائی کی تیاری کر رہا امریکہ، صدر بائڈن پر سب کی نگاہیں

یوکرین پر روسی حملے کے بعد کئی بڑے ممالک نے روس پر کئی طرح کی پابندیاں لگائی ہیں، اور یہ سلسلہ لگاتار بڑھتا ہی جا رہا ہے۔ ان کی کوشش ہے کہ روس کو معاشی طور سے کمزور کر دیا جائے۔ امریکہ نے تو روس کے خلاف انتہائی سخت رخ اختیار کیا ہوا ہے۔ اسی درمیان خبریں سامنے آ رہی ہیں کہ امریکہ نے روس سے تیل درآمد کرنے پر پابندی عائد کرنے کا اعلان کر دیا ہے۔ ایسو سی ایٹیڈ پریس کی خبر کے مطابق یوکرین پر روسی حملے کے جواب میں بائڈن منگل کو اس پابندی کا اعلان کر سکتے ہیں۔ وہائٹ ہاؤس نے کہا ہے کہ یوکرین پر بے وجہ اور نامناسب حملہ کے لیے روس کو جواب دہ ٹھہرانے کے لیے کارروائی کا اعلان کرنے کے لیے بائڈن تیار ہیں۔

واضح رہے کہ امریکی صدر جو بائڈن نے گزشتہ مہینے روس کے خلاف اپنی پابندیوں کو مزید آگے بڑھاےت ہوئے روسی صدر ولادیمیر پوتن اور ان کے وزیر خارجہ سرگیئی لاوروو کے سفر پر بھی پابندی عائد کر دی تھی۔ امریکہ نے تب چار روسی بینکوں پر مالی مدد دینے پر بھی پابندی عائد کی تھی۔ اس کے علاوہ جدید ٹیکنالوجی تک اس کی رسائی رخنہ انداز کرنے اور روس کے اراکین پارلیمنٹ کے امریکہ سفر پر پابندی بھی لگا دی تھی۔